Teks pal

Dihang nihugpa na ang ayroplano nga gisakyan ni Allan gikan sa gawas sa nasud, naghinamhinam na siyang makigkita sa iyang teksmate. Naglingkod na siya sa arrival area sa Mactan International Airport. Iyang plano, di lang una siya mouli direkta sa ila sa Aloguinsan.

Total, wa man kahibalo iyang asawa nga mauli siya karong adlawa. Sunod semana pa man ang petsa nga iyang gisaad sa iyang kapikas nga makauli siya. Si Mildred ang tekspal niya balig usa ka bulan samtang nanakay pa siya sa bapor iyang gialagaran nga biyahe og Europe. Iya nalang gyung tawgon si Mildred aron masuta nga konpirmado nga magkita sila. Gusto sab niyang madungog ang tingog sa dalaga. Nibagting na ang selpon sa pikas linya. Dili matukib sa pulong iyang kahinam.

Mga minyo na ang tulo ka mga anak ni Allan. Nangapo na sila si Daisy iyang kapikas. Karon lang siya nagpatental og teksmate-teksmate. Sukad naminyo si Allan, wa na gyud siya patental og laing babaye. Sa uyab pa sila ni Daisy, upat sila tanang uyab ni Allan. Unsaong, kaya man sa iyang bulsa. Usa man siya ka Chief Mate sa barkong biyahe og overseas. Tuo ka bulan iyang trabaho. Unya human sa tulo ka bulan, bakasyon og usa ka bulan. Sa usa ka tuig, siyam ka bularan ra iyang matrabahoan. Tulo ka bulan ang bakasyon. Taas siya’g panahon sa lulinghayaw. Kay minilyon man sab iyang makobra human sa tulo ka bulan.

Niangkon siya ni Daisy nga duna siya’y duha ka uyab nga napaangkan. Apan wa nagpasuporta niya ang mga inahan. Kay tag-as og garbo ug nagduda sab nga dili siya ang amahan. Dihang nasayran ni Daisy ang kaliwat ni Allan nga mga palikero, gipahunat si Allan kun sa iyang trabaho, matental pa ba siya’g laing babaye. Nangante si Allan nga di magpatental. Bisa’g nasayran ni Daisy nga ang lolo ni Allan (amahan sa iyang papa) dunay pito ka anak sa pagkaulitawo. Ang laing lolo (amahan sa iyang mama) dunay 12 ka buok anak sa gawas.

Sa niaging bulan, dunay niteks ni Allan nga nagpaila nga siya si Mildred, dalaga. Nakuha kono niya ang numero sa selpon ni Allan gikan sa amiga ni Mildred. Giganahan si Allan nga makigteksmate ni Mildred. Usa ka bulan gyud silang teksmate. Dalaga kuno si Mildred. Nagpaulitawo-ulitawo sab si Allan. Unay nagkasabot nga magkita inig bakasyon ni Allan.

“Hello” ni Mildred sa pikas linya. Dugay’ng nakatingog si Allan. Kay sinati kaayo niya ang tingog sa iyang asawa.

“Ikaw diay ni Daisy? Ang nagpa-Mildred-Mildred!’ ni Allan. Gikulbaan pag-ayo.

“Giteksan tika ginamit ang laing simpak. Nasuta na ron nako nga matental gyud diay ka’g laing babaye, labi na’g textmate” ni Daisy nga mabiaybiayon ang tuno.

“Mao bitaw’ng nanawag ko kay gaduda ko nga mora’g ikaw ang akong teksmate. Kay maomao man ang mga pulong sa teks sa imong sinultihan,” ni Allan. Nagpalusot.

“Moingon ka na lang ana, kay nasakpan na man ka” ni Daisy.

“Wa pa may nahitabo. Ang akong sala, mao nga nakigteksmate ko’g laing babaye sa akong hunahuna. Pagtawag nako, imo unta dayong giusab imong tingog. O kaha nisugo ka’g laing babaye aron motubag” ni Allan.

“Mao lagi” ni Daisy.

“Gawas pa kun nakigteksmate ko’g laing babaye, unya daghan pang manghitabo bisa’g makigkita pa ko. Kay posible man sang di ko kauyon niya o siya ba kahay di kauyon nako. Busa, dili pa gyud sala ang akong pagpakigteksmate,” ni Allan.

“Ilhanan na gyud nga gusto kang makigrelasyon og laing babaye. Wa gyud kay kalainan sa imong mga lolo. History repeats itself,” ni Daisy. “Good history, repeat. Bad history, no repeat. Akong mga lolo, tungod sa ilang kapalikero, rabanit nga natiguwang. Pobre pa’s ilaga pagkamatay nila. Busa, wa gyud koy tinguha nga mokopya sa ilang bisyo. Kay kun gusto pa kong sige’g pamabaye, di lang unta ko magminyo. Inig abot nako sa ato, ako ning isurender nimo akong selpon. Di na ko maghupot og selpon,” ni Allan. Namahid sa iyang singot sa agtang. Nangluspad. Hilabihang ulawa niya sa kaugalingon nga iyang teksmate nga gituhoan niyang dalaga, iya ra diay’ng asawa. (Kataposan)