Hulog gikan sa Langit

Gibati og kagutom si Roel human sa taud-taud niya nga pagsuroy sa Ayala Mall mao nga misulod siya sa usa sa mga food outlet nga nahimutang sa The Terraces.

Gipasiklapan ni Roel ang iyang relo ug nakita niya nga hapit na alas nueve sa gabii. Samtang nagkaon si Roel gilantaw niya ang talan-awon sa gawas kay duna man sa’y didto ra magkaun ug mi-enjoy sa presko nga hangin.

Mikalit lang pagkuba ang dughan ni Roel kay nakita niya ang usa ka babaye nga may gikaestorya sa telepono. Gitutokan pag-ayo ni Roel ang babaye lagbas sa bildo nga bungbong sa restaurant.

Nagduha-duha si Roel kun ang babaye nga iyang nakita nga naglingkud sa gawas mao ba si Mariven. Padayon niya kini nga gitutokan samtang nag-usap siya sa iyang gikaon.

Sa unang higayon wala makabantay ang babaye nga adunay mga mata nga nagsud-ong kaniya, apan sa ngadto-ngadto nakabantay ang babaye nga gisigihan siya’g tan-aw ni Roel.

Diha’y higayon nga nagkatagbo gayud ang masi’g nila ka panan-aw. Milingiw kadiyot si Roel ug nagpatuo nga wala niya tuyoa ang pagtutok sa babaye.

Apan dihang gibalikan niya pagtan-aw, nagkasugat na usab ang masi’g nila ka tinan-awan. Linginon og panagway ang girlfriend kaniadto ni Roel nga si Mariven.

Kataposan niya nga nasayran nga nagtrabaho na kini sa usa ka ahensya sa kagamhanan dinhi ra gihapon sa dakbayan sa Sugbo. Ang nakalahi lang niini nga babaye kay kusog manigarilyo.

Gihandom ni Roel nga wala gayud siya makakita ni Mariven kaniadto nga manigarilyo sa kapin sa duha ka tuig nila nga relasyon  ug hangtud nga sila nagkabuwag.

Dihang nahuman na ang babaye sa pakighinabi sa iyang kaestorya sa selpon, natataw na gayud ni Roel nga dili kini si Mariven apan kaamgid-amgid gayud ang ilang panagway.

Gihandum ni Roel ang matam-is nila nga kagahapon ni Mariven kaniadto. Kadtong mga higayon nga gakson na niya ang lumoy kaayong lawas sa dalaga panahon nga sila manuroy sa dapit nga sila ra’ng duha.

Unya may gikaestorya na usab ang babaye sa iyang selpon. Nahuna-huna ni Roel nga tingali daghan gayud ang mokontak sa maong babaye tungod sa iyang kaanyag.

Padayon niya kini nga gitutokan ug sa ikatulo nga higayon nagkasugat na usab ang ilang tinan-awan. Taud-taud, nahuman ang babaye sa pakig-estorya sa iyang kontak sa selpon.

Mitindog ang babaye ug misulod sa restaurant. Nasabot ni Roel nga muadto kini sa CR. Misamot og kuba-kuba ang dughan ni Roel dihang nagpaingon na sa iyang nahimutangan ang babaye.

Gitutokan ni Roel ang babaye ug mipahiyom usab kini kaniya. – Sumpayan