Simon gilabay og mga itlog
CEBU, Philippines - Wala’y plano nga mopasaka og kaso ang kampo ni Simon Cowell ngadto sa 30 anyos nga babaye nga ginganlan og Natalie Holt nga nanglabay kaniya og itlog atol sa grandfinals sa Britain's Got Talent sa miaging adlaw. "As a result of her misguided actions, the police were called. However, we have decided to take no further action at this stage," tipik sa statement nga gipadala sa mga organizer sa Britain's Got Talent.
Matud pa nga samtang nikanta sa entablado ang magsuong Adam ug Richard Johnson, kalit lang mipatim-aw si Natalie og gilabayan og itlog si Simon.
Sakop si Natalie sa backup orchestra sa magsuong finalists sa maong show, ug moabot matud pa sa lima ka mga itlog ang gilabay niini ngadto kang Simon hinungdan nga gihubo na lang ang gisul-ob niini nga jacket ug nagpadayon ang show. Dugang pa sa mga nagdumala sa maong show nangayo og pasaylo si Natalie ngadto nila ni Adam ug Richard Johnson gumikan kay giilogan niya kini og eksena.
Gibarogan gihapon ni Natalie ang gibuhat niya kang Simon gumikan kay matud pa dili kini maayong impluwensya sa music industry.
Una na nga gisaway si Simon sa iyang mga kritiko niadto nga naghulma og mga bitoon apan dili gyud maayo mokanta ug igo ra kini nangita og artista.
- Latest
