Amahan sa gilugos hilabihan ka mangtas

Dunay gilugos dinhi sa sityo Dugos-Ligwan ug ang gilugos mao si Titat ang kinse anyos nga dalagita nga anak ni Asiong manunupi. Tungod niini, nagpabiling way tingogtingog ang dalagita nga natruma sa nahitabo kaniya.

Grabe kaayo ang nahitabo sa dalagita kay gipasopasoan ang lawas niini ug daghan kaayong bun-og ang kalawasan. Kaingon gani ang mga silingan nga dili na kini mabuhi kay wala na man maglihok dihang gidala kini sa hospital. Tungod niini,mipasalig ang hepe sa kapolisan sa lungsod nga ila gyung paningkamotan nga masikop ang mga kriminal nga way puangod nga milugos sa batan-ong babaye.

“Magbayad ang nagbuhat niini sa akong anak,” naghilak si Asiong nga namulong niini ngadto sa mga silingan nga moanha sa balay aron lang motan-aw sa kahimtang ni Titat. Unya, milabay ang duha ka bulan, dunay nabantayan ang mga silingan nga usa ka tiguwang nga mag-anhaan sa balay nilang Asiong. Ubanon nga tiguwang ug kanunay kining magsul-ob og itom nga jacket.

“Nakamatikod ka, Berto, nga si Asiong, wala na manupi,” ni Petra pa nga mipahayag ngadto sa bana.

“Kinsa may ganahan nga manupi labi nag ingon ana ang nahitabo sa  iyang anak nga mora’g usa na lang ka patay’ng buhi. Dili na motingog ug magsulatok na lang ang mga mata...” ni Berto pa ngadto sa iyang asawa.

Unya matag gabii may madunggan silang tingog sa wakwak. Usahay, ngiyaw sa iring nga mora’g isog kaayo. Ug dayon mouwang ang iro nga makapanlimbawot kaayong paminawon.

Sa tindahan nila ni Iska-Bertong, malipayon kaayo ang grupo o gang ni Maximo. Si Maximo, ang gikahadlokan dinhi sa ilang baryo kay daghan nang gipatay. Kasagaran sa iyang patyon pinaagi sa pusil ug kay anak sa mayor, maong kadali rang makagawas sa prisohan human sa piyansa ug ang abogado na lang nila maoy moasikaso sa kaso.

Usa ka gabii, samtang nag-inom ang “Gang” diha sa tindahan gihapon ni Bertong, wala tuyoang nalibkas sa dila ni Maximo ang pangalan ni Titat. Niini pa, “nindot kaayo si Titat, di ba mga parts. Virgin pa kaayo....hoooooo....” Ug igoigo gyung nakahuman og litok si Maximo sa iyang gipamulong may mitumaw nga tawo nga kalkag kaayo’g buhok, laksot ang nawong ug mitingsi kini ug nangsiwil ang tag-as niining bangkil. Dayon gihasmagan ang mga bagis. Gikuniskunis, gipaakpaak. May miibot sa ilang pistola, apan wala pa gani kakablit sa gatilyo, mosidlit dayon ang dugo sa ilang liog nga paakon sa mangtas nga ungo.

“Grrrrrrrrrr....hrrrrrr... huwaaarr!” Ug human sa grabeng pagkuniskunis sa mga lawas sa walo ka bagis mihinay kini’g lakaw sum-ok sa naglawod nga kangitngit.

Ug  si Bertong nga nakasaksi mikurog sa kalisang kay nangalasik ang unod sa tawo ug mibanaw ang daghang dugo sa tugkaran sa iyang tindahan.

Ug ang gikahadlokan kay nakaila siya sa mangtas. OO, nakaila siya ug dili mahimong masayop siya nga si Asiong ang iyang nakita human imna ang dugo sa mga bagis nga pinangulohan ni Maximo. Sila diay ang milugos kang Titat nga anak ni Asiong nga karon usa na ka mangtas nga ungo. (Kataposan)