Manggiulawon Gula 7

“Sure, sige manuroy ta ugma kay Saturday man, one subject ra ko,” matud ni Karlyn dihang giagni siya’g deyt ni Jerson. Human sa klase ni Karlyn pagkaugma, giadto siya ni Jerson sa iyang gipuy-an.

Apan naabtan ni Jerson si Manny nga didto na’ng daan sa balay nga gipuy-an ni Karlyn. Mingaw usab ang balay kay sanglit Sabado, nanglakaw ang ubang ka boardmate ni Karlyn.

“Ako’y nakauna og pamisita ni Karlyn bai, padaplin lang usa ka aron wala’y gubot,” init gihapon si Manny. “Apan nagkasabot mi si Karlyn nga manuroy karon,” bugnaw ang tingog ni Jerson.

Nakita ni Jerson nga si Karlyn nagsige og kilo-kilo sa iyang kilay nga nagpasabot nga dili patuohan si Manny. “Giingnan na lagi tika Manny nga mag deyt mi karon si Jerson,” ni Karlyn pa.

Kalit nga mitindog si Manny ug mihana og sukmag ni Jerson apan abtik kaayo ang ulitawo nga milihay ug gidawat ang bukton ni Manny, dayong sawilik niini sa daplin.

Maayo nga pagkaumod ni Manny sa dihang gigamit ni Jerson ang nakat-onan niya sa Aikido nga gitudlo kaniya ni Sensei Dhong Reynaldo.

Sa kapungot, tiwasan pa g’yud unta ni Jerson si Manny apan nakita niya nga miwara-wara na sa iyang kamot si Manny kang kansang nawong nagkadugo.

“Okey, mohural nako nimo Jerson, maantigo ka diay sa martial arts. In-love man gud unta kaayo ko ni Karlyn apan kay anaa man siya makagusto nimo, itugyan ko siya kanimo Jerson,” ni Manny pa nga nagpamahid sa dugo gikan sa iyang nawong nga naumod.

Milakaw si Manny human sila magkalamano. Nagpahiyumay sila si Jerson ug Karlyn. Maayo unta kun matapos na ang atong problema ug nga dili na mangita pa’g away si Manny.

“Dili na lang ta molakaw uy kay gibilin ko sa among land lady dinhi kay duna siya’y gilakaw ug nanglakaw ‘sab ang ubang boarders,” giingnan ni Karlyn si Jerson.

“Mao ba? Kun mao kana, lugar ‘sab nato karon kay wala’y laing tawo dinhi sa balay ug makabongga ta sa pagparayganay,” matud ni Jerson.

Giluknit ni Karlyn ang iyang kilid. “Dali na, sirad-an nato ang pultahan kay basin mobalik pa kadto si Manny nga magdala og mga kauban. Adto ta sa sala magsultihanay,” matud ni Karlyn.

Sa sala nagtupad pagpanglingkod sila si Jerson ug Karlyn. Wala gayud mag-usik og higayon si Jerson ug iya dayon nga giparaygan ang iyang maanyag nga girlfriend.

“Basin imo lang ko nga binuangan ha, paninglan ka g’yud ni Manny,” nagpahiyom si Karlyn nga mibaud sa iyang boyfriend. Nagginaksanay sila’ng duha ug gitagbaw ang ilang kaugalingon kay wala’y laing tawo sa balay. (Kataposan)