Hamis kaayo’g Paa - Gula 3

Mitutok ang bayot kang Lino pagkadungog nga nangita kini og babaye nga mahimo niya nga ikadeyt nianang gabhiona.

“Nangita ka diay og kadeyt sir? Kadto diay si Jonalyn wala diay mo magkasabot?” matud ni Tonette nga miaksyon og lingi sa pultahan sa CR sa Chow Queen nga gisudlan sa dalaga.

Nakalitan si Lino pagkadungog sa gisulti sa bayot. “Pwede nako nga ideyt si Jonalyn?” gisukna ni Lino si Tonette. Wala motingog si Tonette kay nakita niini nga nagpaingon na sa ilang nahimutangan si Jonalyn nga gikan sa CR.

Gitutokan ni Lino si Jonalyn nga nagpaingon sa ilang lamesa. Hinay-hinay siya nga nagduda nga si Jonalyn usa diay ka call girl kay matud ni Tonette  nga pwede man kini nga iyang ideyt bisan og dili sila mag-uyab.

“Unsay inyong gipanagsultihan nga nahilom man dayon mo pag-abot nako?” gisukna ni Jonalyn ang duha. Igo lang nagtinutokay sila si Tonette ug si Lino. Apan nakahuna-huna og paagi si Lino pinaagi sa pagsangkil sa tiil sa bayot ilawom sa lamesa ug dayon gikihatan ang mahuyang.

Dali kaayo nga nakasabot ang bayot sa buot ipasabot ni Lino kaniya. “Day, nangutana si sir kun pwede ka ba kuno niya nga ikadeyt karon. Sigi na day maayo kay sayo pa nga gabii,” giingnan ni Tonette si Jonalyn.

Karon natibuok na gayud sa huna-huna ni Lino nga usa ka call girl si Jonalyn ug nagpaso-paso kini sa mga dapit sa Fuente Osmeña samtang nagsul-ob og attractive kaayo nga short pants kay aron maibog kaniya ang mga lalaki.

Wala motubag si Jonalyn sa gipangutana kaniya sa iyang amiga nga si Tonette. “Day, pwede ba kuno nga magdeyt mo ni sir,” subli nga gipangutana ni Tonette ang iyang amiga. “Nganong ikaw may nangutana nga anaa man siya?” matud ni Jonalyn nga nagngisi.

Nasabtan ni Lino nga oki ra para kang Jonalyn nga magdeyt sila bisan karon pa sila nagkaila. “Sigi, manglakaw usa mi si Jonalyn... unya ikaw Tonette asa ka man?” pangutana ni Lino sa bayot.

Dia ra ko dinhi sa palibot sa Fuente Osmeña. Dayon may gihunghong si Tonette kang Lino. “One thousand five ang rate anang Jonalyn sir... ibilin lang daan nako ang bayad.”

Nagpasumangil lang si Jonalyn sa pagpindot-pindot sa iyang selpon samtang sila si Lino ug Tonette maoy nagsabot sa presyo bugti sa pag-uban niya’g deyt sa lalaki. “Oki ra ka  nga makigdeyt nako karong gabhiona Lyn?” gisukna ni Lino ang dalaga.

Igo lang miyango si Jonalyn ug mipahiyom. Mikuot dayon si Lino sa iyang pitaka og gihatagan og tibuok P1,000 si Tonette. “Ang kuwang ihatag nako ni Jonalyn,” ni Lino pa. - Sumpayan