Maria Magdalena - Gula 71

Mangompra man gud ko, Ma,” kadali ra kong nakahulbot og bakak nga katarongan. “Pirmeng mahutdan og stock ang akong tindahan.”

“Nganong dili man nimo tingbon ang pagpangompra sa tanan nga imong gikinahanglan aron dili ka magpunay og biyahe. Madato baya ang V-hire nianang imong kalaki. Silay mabulahan niana.”

“Sagdi lang gud, Ma. Wala bitaw sab koy laing lingaw dinhi ma-enjoy man sab ko sa pagsige’g biyahe.”

Wala na lang magtingog si Mama Linda.

Nagpadayon ang tinagong relasyon namo ni Emilio. Nalipay ko kay mapuy-an lang gihapon nako ang langit bisan ania pa ako ibabaw sa yuta. Maayo kaayo’g performance si Emilio. Dili gyud magmahay ang babaye nga makasulay niya. Anad na gyud siya kaayo sa paglipay og babaye. Daghan siya’g taktika sa pagtukbil sa gana sa usa ka babaye.

Dihay higayon nga gidala ko ni Emilio sa Bas gamay beach sa Moalboal. Nag-overnight mi didto. Miokupar mi’g cottage. Didto gisubli-subli na usab  nga gitagay namo ni Emilio ang dugos sa lawasnong himaya. Gitagbaw namo’g maayo ang among kaugalingon.

Apan samtang nagkadugay, ingon sa nagkahangol na man hinuon kami sa maong buhat. Mao gisubli-subli kini namo pagtagay sa walay pagkapuol.

Nahikatulog kami si Emilio sulod sa cottage human sa ikalima namong lovemaking session.

Apan nahigmata ko nianang pagka kaadlawon kay gipukaw sa panginahanglan pagtubag sa sugo sa lawas. Sumpayan pa