Maria Magdalena

Gula 70

Taga Carcar si Emilio ug ang labing pabor nga dapit nga mag-abot kami mao ang siyudad sa Sugbo kay sa Zuelig man siya nag-ahente nga anaa dapit sa reclamation area.

Sa matag higayon nga magkita mi, mo-check in dayon mi sa usa ka hotel. Kulang alang namo ang tulo ka oras sulod sa pribadong lawak. Dunay panahon nga mag-overnight mi. Mao nga dili dayon ko makapauli sa Ginatilan kun moadto ko sa siyudad usahay pagkasunod adlaw na ko makapauli sa among pinuy-anan.

Magtagbaw man gud kami si Emilio sa pagtagay sa lawasnong kalipay. Bigaon kaayo si Emilio. Bisan maligo pa ko sa sulod sa banyo iya na kong tirahan. Unya iya na pud kong usban inighuman nako’g kaligo. Basta sa higayon nga mosulod mi’g hotel, tition gayod namo sa pagtilok ang mga gutlo sa pagsawo sa dugos sa himaya.

Hangtod nga miabot ang panahon nga ang akong mama nagmatingad-on na sa kanunay kong pag-adto sa siyudad. Mataymingan man gud nga wala ko kun mobisita si Mama kanako, ug usahay mo-text siya wala ko sa balay. Mao nga gibuyag na ako ni Mama Linda kay nakamatikod siya nga subsob na kaayo ang akong pag-adto sa siyudad.

“Unsa bay sigehan mo’g adto sa siyudad, Maria?” Sukit ni mama usa ka higayon niana. “Dili ba kada kataposan sa bulan man ang imong ikobra sa imong allotment gikan kang Daniel? Kuyaw na baya ang panahon karon, tingali’g may  naniid na kanimo.” -- Sumpayan pa