Basin mahinumdom ka

Pista kadto sa ilang barangay sa dihang nagkita pag-usab sila si Joshua ug Mae. Didto sila magkita sa kapilya kay si Mae sakop sa komite sa dekorasyon niadtong adlawa ug si Joshua misimba kay mao pay pag-uli niya gikan sa dakbayan sa Sugbo diin siya nagtrabaho. Managkauban sila sa klase sa elementarya ug nagkabulagay hangtud nga karon pa nagkita.

“Mae, migwapa lagi ka!” timbaya ni Joshua pagkahuman na sa Misa.

“Karon pa diay ka kamatikod, Josh?” ni Mae sa iyang naandan nga pagka tistisan.

“Aw, kamatikod man, kaniadto sa klasmet pa ta. Pero karon god, misamot man,” ni Joshua nga giganahang misud-ong sa matahom nga panagway sa kanhi klasmet.

“Asa na man ka ron, Josh? mipalain si Mae.

“Nagtrabaho na sa siyudad, nagtudlo ko sa UC. Ikaw, Mae?”

“Nangita pag trabaho.”

“Unsa gani toy natapos nimo?”

“Midwifery.”

Mao toy sinugdanan sa taas pang estorya. Pagpamauli nilang Mae, mikuyog si Joshua kay may naglungotlungot nga pagbati sa iyang dughan. Nakadiga gayod siya, ug bisan wa pa dawata sa dalaga, natataw ni Joshua ang kahayag sa paglaom. Gani sa dihang mihangyo siya nga manuroy pagka ugma, miuyon man si Mae. Nagkasabot sila nga mangadto sa Hisoler Beach Resort sa Barangay Nailon, sa dakbayan sa Bogo.

Didto sa beach resort miabang si Joshua og cottage. Dili unta mosulod si Mae kay sila ra mang duha. Apan misulod na lang tungod kay didto na man si Joshua, ang-ang pod og siya ra maoy anha sa gawas.  Pagsulod na sa dalaga, buot untang pahimuslan sa ulitawo ang higayon nga maangkon ang pagka babaye sa kauban. Apan mibalibad gayod si Mae ug nakita ni Joshua ang pagpitokpitok sa mga mata niini timaan sa kalugmawon nga mga luha. Maong wala na ipadayon ni Joshua ang iyang tuyo. Nag-estoryahay na lamang sila.

“Nasuko ka, Mae?” ni Joshua pa.

“Wa man. Sorry, ha, nga di nako ikahatag ang imong gusto karon. Next time na lang,” ang tubag ni Mae.

Daghan ang higayon nga nagkauban sila. Diha pay didto sila sa dakbayan sa Sugbo sa dihang naaksidente sa motorsiklo ang amahan ni Mae ug gidala sa dakbayan sa Sugbo diin kinahanglan moestar og dugay sa tambalanan. Maong kanunay nang magkita ang duha. Kadaghan usab ang higayon nga mohatag og kuwarta si Joshua kang Mae isip panggasto-gasto sa dalaga. Apan wa gyod ikatugyan ni Mae ang iyang kaugalingon ngadto ni Joshua.

“Sagdi lang, Josh, asa ra man unya na.”

“Ang ako ba, Mae, basin magkabuwag ta,” nakahisgot niini si Joshua kay mitug-an man si Mae nga duna siyay ka-chat-chat nga Amerikano.

“Kun mahitabo man gani nga magkabuwag ta, sa dili pa ko maadto’g lain, ihatag ko nimo ang imong gipangayo,” maoy pasalig.

Mao nga milaom si Joshua. Hangtud nga miuli na lang si Mae sa ila kay naayo na ang iyang papa. Tagsa na lang sila magkita.

Ug nasayran na lamang ni Joshua nga naminyo na si Mae -- dili sa Amerikano -- kondili sa lain nga uyab niini. Igo na lamang sa pagpanghupaw si Joshua. (Kataposan)