Ang Mayo may nobya ug nobyo

“Unsa mangasawa ka gayud kanako Jesso? Kanus-a man kuno ikaw mamalaye didto sa amoa? Andam ka ba gayud makig-atubang sa akong mga ginikanan? Aron sila imong kasultihan bahin sa atong kaminyuon? Ug may daghan ka ba og kuwarta nga ikapalit sa mga baboy ug mga baka alang sa atong kasal nga may kumbera?” miingon si Lita kang Jesso nga sa sapa sayo nga nanglaba, ning buntaga.

“Oo, Lita, aduna! Atong idungan ang atong kasal sa pagpiyesta ni Senyor San Isidro Labrador, dinhi sa atong Barangay Puting Bato! Maayo daghan usab ang maggasto sa piyesta. Mabahinbahin ang mga tawo nga mangumbera! Unsa man Lita, mosugot na ikaw kanako nga kanimo mangasawa?” Suna ni Jesso kang Lita nga iyang trato.

“Oo, Jesso, kay nahigugma man usab ako kanimo! Hala, lukdoa kining akong planggana karon Jesso. Ug ihatod ako sa amoa! Unya sultihi  sila si tatay Magno ug si nanay Talya nga kita magminyo na!” ni Lita pa nga miulog sa planggana sa ulo ni Jesso aron kini ipalukdo. Ug nagkuyog nga pulos mga malipayon ang managtrato. Pag-abot nila sa balay ni Lita, hubog usab diay kaayo si Ingko Magno. Sanglit lagi wala makagusto si Ingko Magno sa pagkatawo ni Jesso nga timawa usab kaayo nga pagka mag-uuma. Kalit kining milanit sa mahait niyang pinuti gikan sa sakoban!

“Tadtaron ko ikaw karon Jesso sa akong pinuti. Nganong mikuyog ikaw sa akong anak nga si Lita. Unsay tuyo nimo kanamo? Tug-an karon dayon aron sa akong pinuti dili ko ikaw tagudtaguron,” ni Ingko Magno pa nga nagwarawara sa mahait niyang pinuti.

“Tay ayaw intawon tadtara si Jesso sa imong pinuti! Kay natuhog na usab sa iyang pinuti ang bebingka kong liki. Mabdos na ako ug duha ka bulan.  Dili ako buot nga matawo kining bata sa akong sabakan nga walay ilhon nga usa ka amahan. Busa Tay Magno, ania si Jesso aron gayod mangasawa kanako. Hu-hu-hu-huuuu....” matud pa ni Lita nga sa iyang amahan usab midrama. Mabibo ang piyesta ni Senyor San Isidro Labrador sa Puting Bato. Daghan usab kaayo ang mga tawo pagmisa ni Padre Ramonito Degamo. Gikasal usab sila si Lita ug Jesso. Malipayon kaayo ang nobya ug nobyo diha sa pari nga mokasal kanilang duha. Unya gipangutana ni Padre Degamo si Jesso.

“Jesso dawaton ba nimo nga si Lita mahimong asawa?”

“Oo, Dre, akong dawaton hangtud sa kamatayon,” tubag ni Jesso sa pari nga mapahiyumon ug malipayon. Unya si Lita na usab ang gipangutana sa pari.

“Ikaw Lita, dawaton ba usab nimo nga mahimong bana si Jesso sa tibuok mong kinabuhi ning kalibotana?” ni Padre Ramonito Degamo pa nga misukna sa pagpangutana ni Lita. Mipahiyum  usab ang pari sa gipangutana nga nobya.

“O, Padre Degamo. Sa kasakit ug kalipay kaming duha gayud unya ang magtinambayungay.” Ni Lita pa nga mipahiyom og matam-is kaayo sa iyang nobyo nga si Jesso.

Sanglit bugtong lagi si Lita nga pagka anak nila ni Ingko Magno ug manang Talya. Ang bag-ong kinasal wala ipaganas nila ngadto sa panimalay sa mga ginikanan ni Jesso nga sila si Ricardo-Aurora. Unya miingon kini kanila ni Ingko Magno ug manang Talya: “Pre Magno ug Mare Talya, sige mouyon na lang gayod kami nga sila si Lita ug Jesso dili na lang ganason namo,” matud pa ni Ricardo nga miagbay sa abaga ni Ingko Magno. “Okey, lang Pre, Ricardo. Total may kaugalingon man nga lawak si Lita,” tubag ni Ingko Magno nga mibalos usab sa pag-agbay sa abaga ni Ricardo.

Pagka gabii niana, sa unang gabii sa ilang kasal ni Jesso ug Lita, natay-og ang tibuok balay ni Ingko Magno ug manang Talya. Ang bag-ong magtiayon pulos gayod mga mahinamon nga mitungas sa makutas nga bukid sa kahimayaan. Sila si Ingko Magno ug Manang Talya nga nakahinumdom sa panahon sa ilang kabatan-on. Natakdan usab nila ni Lita ug Jesso nga misulod sa matam-ison nga himaya sa paraiso. (Kataposan)