Cashier nga gwapa

Nagdali si Ricky nga misulod sa usa ka kan-anan dili halayo sa Cebu City Hall kay gigutom na kaayo siya. Nakalimot man gud diay si Ricky nga wala diay siya maka-breakfast kay nalingaw pagpaniid kinsa gayud ang modaug sa mga kandidato.
Gisugo si Ricky sa agawon niya nga abogado aron maoy mopahibalo dayon kun duna nay kalamboan sa pag-canvass sa nakuhang botos nila ni Mayor Michael Rama ug Kongresista Tomas Osmeña, ingon man nila ni Vice Mayor Joy Augustus Young ug Konsehal Edgar Labella.
Human maka-order og makaon, didto si Ricky milingkud sa lamesa nga daplin sa bungbong nga bildo ug nag-atubang sa sulod nga bahin. Ang iyang panan-aw milahus ngadto sa usa ka grocery sa pikas nga makita ra kay bildo man ang bungbong sa kan-anan.
Wala tuyoa ni Ricky nga ang iyang panan-aw didto masangit niadtong babaye nga bisan og tua ra sa layo apan daw nagpangidlap ang iyang kaanyag. Gitutokan ni Ricky ang maong babaye ug wala gayud siya masayup, gwapa g’yud.
Dihang miiway na ang mga tawo nga nakasalipod sa babaye, iyang nasayran nga usa diay kini sa mga cashier sa grocery. Samtang nagkaon si Ricky sa giorder niya nga pagkaon, didto ra ang iyang mga mata sa maong babaye.
Human og kaon ni Ricky, wala gayud siya mahimutang. Misulod siya sa grocery ug nagpasumangil kini nga mopalit apan ang iyang tumong mao ra gayud ang pagsud-ong sa babaye.
“Gwapa g’yud lagi,” matud ni Ricky sa iyang kaugalingon samtang nagpasiklap sa babaye nga didto sa cashiers booth. Miadto si Ricky sa gibutangan sa mga drinks ug mipalit siya’g energy drinks.
Gituyo gayud ni Ricky nga didto molinya sa lane sa maong gwapa nga cashier. Gitunol niya ang tibuok P1,000. “Wala ka’y laing small amount sir?” giingnan si Ricky sa cashier nga nagpahiyom.
“Wala makaabut, fifty ra ang akong sensiyo,” ni Ricky pa nga mitutok sa nameplate sa cashier. “Gina diay ang imong name,” matud ni Ricky nga mitanyag nga ibilin ra niya ang iyang sukli ug balikon lang.
“Bilin lang ‘sa nako Gin kay gadali ko basin may announcement na ang Board of Canvassers,” ni Ricky pa. “Ayaw lang dia may ikasukli. Kinsa ang labaw’g botos nila ni Young ug Labella? Taga Bacayan baya ko ug taga didto ‘sab na si Labella,” matud ni Gina.
“Mao ba? Silingan diay mo? Hatagi ko sa imong contact numbers kay teksan tika pirmi kun adunay updates sa canvassing sa botos nila ni Labella ug Young,” matud ni Ricky. “Sige baya ha?”  matud ni Gina dayong suwat sa iyang contact numbers ug gitunol ni Ricky. (Sumpayan)