Ang unggoy ni Beloy

Pinangga kaayo ni Beloy ang binuhing unggoy nga si Momoy. Matag buntag, sa dili pa siya moeskuyla sa publikong eskuylahang elementarya sa ilang baryo diin Kinto Grado na siya, iyang liguon ang binuhing unggoy sa kinalos niyang tubig sulod sa usa ka balde.

Iyang syampohan ug sabonan si Momoy. Dayon, iyang itaod og balik ang higot niining kadena sa hawak sa unggoy ug palatayon sa latayanan niining bulos sa kawayan diha sa ilang natad nga gituyo pagbabag kilid sa ilang balay, aron dili mauwanan ang unggoy.

Pakan-on dayon ni Beloy si Momoy og hinog nga saging. Hatagan niya og kan-on nga may sinugbang buwad.

“Galma gyud si Momoy, Loy! Kay siya ra ba ang tigbantay sa atong balay, adlaw ug gabii...!” nagpahiyom ang iyang papa Kardo nga sayo kaayong magbaid sa iyang sundang matag buntag, aron maglampas sa luna sa banika.

“Bitaw, Loy! Kusog kaayo mokarab si Momoy kun dunay laing tawo nga manangpit sa atong balay matag adlaw ug gabii...!” midason ang iyang mama Nida nga sayo sab kaayong mag-andam sa basket nga napuno sa bulad nga isuroy matag adlaw sa ilang baryo.

“Apan usahay sungugon gyud nilang Boyaks ug Junjun si Momoy nga buotan ug di man unta manghilabot ang unggoy, Pa, Ma! Buot nilang palaguton si Momoy...!”

Sila si Boyaks ug Junjun mao ang katalirungan ni Beloy nga mga bata sa ilang balay nga klasymet niya sa Grade Five nga kusog kaayo mopalagot sa binuhing unggoy.

Usa ka Sabado sa udto, maoy naabtan ni Beloy nga gisungogsungog na usab nila ni Boyaks ug Junjun ang iyang binuhing unggoy, pinaagi sa paghapak niini sa taas nga lipak sa kawayan. Nagluksolukso sa kalagot si Momoy. Mikarab siya nga mohana pagdasmag nilang Boyaks ug Junjun.

Kalit nga nahaplos ang higot nga kadena sa hawak ni Momoy ug abtik nga gilayatan sila si Boyaks ug Junjun nga nakuyawan ug miatras sa pagdagan diha sa natad. Napandol sila si Boyaks ug Junjun nga daling gidasmagan sa napungot nga unggoy aron paakon.

“Momoy! Ayaw sila’g hilabti Ayaw sila’g paaka...!” milanog ang singgit ni Beloy dayong sapupo sa binuhing unggoy nga buotan kaayong milukso sa iyang abaga. Gitutokan ni Beloy sila si Boyaks ug Junjun nga mitindog ug namapha sa ilang pagkasukamod.

“Giingnan ta mo, Bay Boyaks ug Bay Junjun, nga ayaw ninyo’g hilabti si Momoy, kay kuyaw ni siya nga masuko...!”

“Pasayloa lang mi, Bay Loy...!” nagkadungan og sulti sila si Boyaks ug Junjun ngadto kang Beloy. “Sukad karon, dili na namo sungugon ug hilabtan ang binuhi mong unggoy...!”

Mikarab si Momoy nga wala na masuko nilang Boyaks ug Junjun niadtong hapona. (Kataposan)