Maldisyon

Nagkabayloay og sakit nga pulong sa Internet sila si Eddie ug Gina. Higala unta sila kaniadto kay klasmet sila ug kababata. Apan sukad nga nagkabuwag si Gina ug iyang bana nga si Frank nga usa ka Amerkano, si Eddie nidapig sa Amerkano. Nakaingon si Gina nga traydor iyang higalang Pinoy, sa iyang kadugo. Tua nilaban sa foreigner nga way katungod dinhi sa Pilipinas.

“Gimaldisyon ko ikaw ug ang imong kaliwatan hangtud sa ikapitong henerasyon” ni Eddie sa iyang gimakinilya  sa computer isip email niya ngadtong Gina.

“Nganong iapil man nimo’g maldisyon akong pamilya? Wa man silay labot sa atong away” tubag ni Gina nga nabasa ni Eddie sa screen sa computer.

Dunay house and lot si Gina nga igbabaligya. Ang nagpundar ini ang Amerkano sa bag-o pa silang minyo. Apan sa diborsiyo nila sa Amerikano, sumala sa hukom sa husgado sa Amerika, ang tanang kabtangan sa Pilipinas maadto kang Gina. Wa nirespeto ang Amerkano sa desisyon sa husgado. Mangayo gihapon siya’g bahin sa kabtangan nga gihukman na nga eksklusibo nga adto kang Gina.

Samtang nanimpalad si Gina og panarbaho sa Amerika, kay utangan siya’s iyang abogado gilungkab ni Frank ang mga kandado sa gate sa house and lot. Gipang-ilisan niya og mga kandado ang gate. Si Eddie ang gipiyalan sa Amerikano sa paghupot sa mga yawe.

Kun dunay mga ahente nga motan-aw sa balay ug yuta, dili pahuwamon ni Eddie og yawe. Kay gusto niya, kun dunay buyer, hatagan sab siya’s ahente og bahin sa commission. Nasuko si Gina. Ug gikasab-an niya pinaagi sa email si Eddie. Maong nibawos sab si Eddie og masakit nga pulong.

“Wa ka may kalooy sa imong bana. Di man nimo bahinan sa inyong kabtangan” ni Eddie. Nimakinilya sa computer.

“Sumala sa balaod, wa siya’y katungod sa Pilipinas. May deportation order na siya. Nadeklarar na siyang Persona Non Grata. Wa na siya’y katungod sa Pilipinas. Plus, ang order sa husgado sa among divorce case, akoa ang tanang butang sa Pilipinas. Busa, wala gyud siya’y bahin. Kay napamatud-an man nako nga salbahis siyang pagkabana. Manapat sa asawa kun mahubog. Ang asawa gihimo lang mutsatsa. Tarong ba nang imong gibuhat nga molaban sa tawong salbahis ug wa nay katungod sa Pilipinas?” tubag ni Gina. Nabasa ni Eddie sa screen sa computer sulod sa iyang lawak.

“Ah basta. Kay nagdinawo man ka, gimaldisyon na lang tika ug imong mga kaliwatan!” ni Eddie.

“Santo Papa ka ba nga makamaldisyon? Dili ko mahadlok sa imong maldisyon. Kay seguro ko nga mosumbalik ra nimo. Ikaw angay mamaldisyon. Kay duha na ka foreigner imong giilad. Ikatulo seguro si Frank. Pila may nasapi nimo adtong French Canadian nga gihimo kang dummy. Nanugon ang foreigner nga bahinan nimo iyang Pinay nga asawa sa iyang kabtangan. Imong gi-blind ang asawa. Kadto sang usa ka German nga nisalig nimo. Imong gihapong gionse. Ayaw pangmaldisyon. Kay dili ka sarang nga makamaldisyon. Ang makamaldisyon tingale ang tawong way anomaliya. Apan ikaw manghud ka lang og diyutay ni Satanas!” ni Gina.

Nanigang mga mata ni Eddie sa kalagot sa iyang nabasa. Gialsa niya ang monitor sa computer. Iya untang ilabay. Apan gibutang niya. Nakaamgo siya nga siya ray alkanse kun maguba iyang mga gamit. Nagpamente siyang nagpawong sa iyang computer ning lawom nga kagabhion. Wa si Eddie magdahum nga may nasayran sab diay si Gina. (Katapusan)