Pulos seaman

Dear Tita Salie,

Have a wonderful day and how are you? Manghinaot ko, Tita, ganado gihapon ka sa imong trabaho kay daghan kaayo ang ganahan ug nalingaw sa imong column.

Tawga lang ko og Ms. Adingel, usa ka dalaga. Duna lang koy gamay nga patambagan nimo, Tita, Salie. Ang akong gikalisdan karon mao ang akong situwasyon ug ang paghimo og desisyon.

Duna man guy nanguyab nako karon ug duha sila kabuok. Kani silang duha pulos mga seaman unya manag-agaw pa gyud. Ug pareho silang duha nga duna koy feelings. Ganahan gyud ko nilang duha.

Kani una mao si Irreplaceable. Dugay na gyud ko ganahan niya kanunay gyud ko mag-pray nga unta manguyab na siya nako karon nanguyab na siya apan maikog pud ko mosugot kay nanguyab man nako ang iyang cousin nga si Mr. One. Unya ganahan pud ko ni Mr. One kay hinagad kaayo siya. Magsige ra siya og smile nako. Mura gyud siya og walay problema ikauban.

Naglibog gyud ko, Tita, kun kinsay akong sugton. Palihog tabangi ug pasabta ko. Thank you very much and more power. God bless.

* * *

Good day Ms Adingel,

Lisod gyud tinuod ang pagpili sa mga pilianan kun kita ganahan sa tanan.Kun puyde pa lang ang tanan atong angkunon, ato na kining buhaton. Pero kinahanglan usab nga atong respetohon ang atong kaugalingon aron kita respetohan usab sa uban. Busa bati gyud tan-awon ug hunahunaon kun ang tanan nga nindot atong hakpon. Kinahanglan gyud nga mopili lang kita og usa aron limpyo ang atong pagkatawo ug sa mga problema kita makalikay.

Bisan kun ganahan ka nilang duha pero duna gyu’y usa kanila nga mas ganahan ka. Mas ganahan ka niya tungod kay dali ra mo magkasinabot, dili siya taas og garbo, mura og gaan siya ika-uban, maka-express ka sa imong kaugalingon ug puyde kang magpakatotoo kun kinsa ka.

Pilia ang tawo nga at home ka kun kauban nimo siya. Kana bang wala kay dapat ikahadlok kay tingali, og masuko siya. Kanang lalaki nga kaya nimong mabuhi nga ikaw gyud. Mao kini ang lalaki nga masinabtanon sa imong pagkatawo ug andam modawat kun kinsa ka. Dili parehas sa uban nga diktaran ka kun unsay ilang gusto.

Pilia ang lalaki nga hatagan ka og higayon nga motubo sa imong pagka-ikaw ug supportive sa imong mga plano sa kinabuhi.

–-Tita Salie