Matinabangon - Gula 3

Diha pa masayri ni Lito nga buotan diay si Gemma ug mapahiyumon nga pagka babaye.

Miorder sila’g makaon para kanila. “Nalipay baya g’yud kaayo si Daddy sa imong nahimo ug mao nga iya ko nga giingnan nga makig-dinner nimo Lit. Sori kaayo ganina kay wala ko makapananghid nga mibiya lang nimo, nagdali man gud ko,” matud ni Gemma.

“Walay problema Gem... ang mahinungdanon nga nakatabang ko sa laing tawo, ilabi na sama nimo nga usa ka babaye,” dali nga tubag ni Lito. Gihatagan og kasayuran ni Lito si Gemma kun unsay angay nga himoon kun mahitabo nga makasinati nga dunay grounded sa iyang sakyanan.

Misugyot si Lito ngadto ni Gemma nga ilisan ang clamp sa iyang battery wire aron dali ra kaayo matangtang bisan dili na gamitan og katala ug plier.  “Duna ko’y usa ka clamp sa sakyanan nako ako kadto nga itaud sa imong battery,” ni Lito pa.

Human nila og kaon, diha pa masayri ni Lito nga duna diay credit account ang amahan ni Gemma sa kan-anan nga ilang gisudlan. Midiritso lang sila’g lakaw human makapirma si Gemma sa resibo.

Nagkuyog sila si Lito ug Gemma paingon sa parking area. Giilisan ni Lito ang usa sa battery clamp sa sakyanan sa dalaga ug gitudloan kun unsaon niya sa pagtangtang pananglit mahitabo pag-usab nga dunay grounded sa mga electrical connection sa awto.

“Sige Lit, salamat kaayo ug mag-text-text lang ta,” matud ni Gemma sa dayon niyang padagan sa iyang kotse gawas sa parking area. Masabot kaayo ni Lito nga arang-arangan pagkabutang sila si Gemma. Mipauli ra si Lito sa iyang gipuy-an sa Hernan Cortes Avenue, Mandaue. Naagi-an ni Lito ang dapit nga naabereyahan ni Gemma. Pag-abot ni Lito sa gipuy-an niyang apartment, mideritso na siya pagkatulog.

Pagka buntag, wala gayud malimot si Lito pag-greet ni Gemma ug “good morning.” Taud-taud, nakadawat si Lito og reply gikan sa dalaga. Nag-text sila’g kadiyot ug diha pa masayri ni Lito nga sila si Gemma anaa diay magpuyo sa usa ka village sa Banilad.

Milabay ang mga adlaw ug kanunay sila nga magbayloay og text messages. Kini maoy nakapasuod kaayo nilang duha ni Lito ug Gemma. “Lit, ari unya ta sa balay karong Saturday night kay birthday ni Papa gisugo ko niya nga imbitahon ka,” ni Gemma pa.

Wala magdugay-dugay si Lito sa pagtangdo. Iyang nahuna-huna nga buotan ang amahan ni Gemma mao nga dili siya mataha nga motambong sa iyang birthday. - Sumpayan