Matinabangon

Gula 2

Hapit na alas singko sa hapon ug naghipos na si Lito sa iyang mga butang aron mopauli. Division Chief si Lito sa ilang kompaniya nga nagbasi sa Cebu Business Park.

Mitingog ang ringtone sa selpon ni Lito. Gipunit niya ug gitan-aw kun kinsa sa iyang mga higala ang nanawag, apan wala ma-register ang numero sa caller.

Gitubag ni Lito, ug nadungog niya nga babaye ang nanawag kaniya. Paraygon ang tingog sa babaye nga nanawag kang Lito. “Imbitaron tika og dinner Lit, ako kadtong imong gitabangan ganina.” Nakapahiyom si Lito ug abtik kaayo nga mitangdo sa imbitasyon. “Sigi miss, asa ta mag-dinner?,” ni Lito pa. Giingnan si Lito sa babaye nga adto sila mag-dinner sa labing taas nga building diha duol sa Fuente Osmeña.

Nakalimot si Lito sa pagpangutana sa ngalan sa babaye. Gitan-aw niya gikan sa Call Log sa iyang selpon ug gipangita ang numero sa bag-o pa nga mitawag kaniya.

Giteksan ni Lito ang maong numero ug gipangutana niya ang caller sa iyang ngalan. “I’m Gemma, going to our dinner,” nakadawat dayon og reply si Lito.

Gisambilay dayon ni Lito ang iyang bag ug mipaingon sa grahe nga giparkingan sa iyang kotse. Dali ra nga miabot si Lito sa dapit nga adto sila mag-dinner si Gemma.

“I’m here already waiting for you Lit,” nakadawat og text message si Lito gikan ni Gemma. Gipaspasan ni Lito ang paglakaw, misakay dayon siya sa elevator.

Misulod si Lito sa kan-anan. Nabantang dayon niya si Gemma nga naglingkod sa usa ka lamesa. “Good afternoon Gem,” giingnan ni Lito ang dalaga.

Naglamanohay silang duha. “Daddy is coming, but he will only stay for a couple of minutes. Gusto ra g’yud siya nga magpasalamat nimo sa pagtabang nako ganina.”

Tuod, wa madugay miabot ang amahan ni Gemma. “Lit, salamat kaayo kay kun wala ka pa, sigurado nga masunog ang kotse sa akong anak. Dili kami makalimot sa imong natabang,” matud sa amahan ni Gemma.

Diha pa nahibaw-an ni Lito nga ang amahan ni Gemma dakung opisyal sa usa ka call center sa Barangay Kasambagan nga duol ra sa dapit nga naabereyahan sa sakyanan ni Gemma kaganina.

“Sige pag-order mo’g inyong makaon, dili na lang ko mouban ninyo Lit sa dinner kay duna ‘sab ko’y dinner nga tambongan,” matud sa amahan ni Gemma nga milamano kang Lito.

“Buotan man diay si Papa nimo Gem,” matud ni Lito. “Yes, buotan kaayo na si Daddy ug pinangga kaayo ko niya.” - Sumpayan