Way kasabutan

Alas onse sa buntag. Nibagting ang telepono ibabaw sa lamesa ni Atty. Wally Agpal. Gipunit niya. “Hello” niya pa. “Attorney, si Felix Cogal ni. Bag-o lang kong naghatud nimo og kuwarta para publication fee. Unya, pag-uli nako sa balay, nakadawat ko’g sulat pinaagi sa LBC. May pakapin kopya sa Marinduque Herald. Gipublikar na diay ang Notice of Initial Hearing sa atong titling case. Naningil og publication fee ang mantalaan” sa pikas linya.

Dunay gipasakang kaso nga pagpatitulo og yuta, si Mr. Cogal. Iyang yuta nga naa sa lungsod sa Consolacion. Sa bulan pa sa Hulyo ang petsa sa initial hearing. Unya, plano ni Wally nga adto niya ipublikar ang Notice of Initial Hearing sa Banat News, isip newspaper of general circulation sa probinsiya sa Sugbo.

“Total disregard. Ayaw na’g tagda sulata. Una, dili balido ang maong publication. Ang Marinduque Herald dili newspaper of general circulation sa Sugbo. Ikaduha, unauthorized ang pagpublikar. Wa nananghid o nakigsabot nato ang Marinduque Herald mahitungod sa pagpublikar. Way kasabutan. Busa, wa sila’y katungod sa pagpaningil og publication fee. Wa sab tay tulobagon o obligasyon sa pagbayad. Nahibulong lang ko nganong nakakuha sila’g kopya sa Notice of Initial Hearing” ni Wally.

“Ah, kun motawag nako, unya moinsister nga magpabayad?’ ni Mr. Cogal. “Hatagi’s akong numero. Patawaga nako. Kay ako ray mopasabot” ni Wally.

Nakapanglingo siya paghuma’g butang sa telepono. “Daghan na gyud rong mga publishers nga gutom. Nanikaysikay intawon. Bisa’g wa na nasubay sa balaod” tuaw niya. (Kataposan) (Sa gusto’g konsulta, dad-a ning pahina sa sugilanon sa opisina sa tagsulat, sa Sabado’s buntag.)