Probinsiyana Gula 7

Samtang nagsayaw sila si Renante ug Gingging, kalit lang napawong ang suga. Nag-brown out diay.  Sanglit dili buwanon ang kagabhion, ngitngit kaayo ang palibot.

Wala buhii ni Renante ang kamot sa iyang girlfriend. “Bai Ren, ayaw lang mo pagbuwag si Gingging ha kay ngitngit ra ba,” ni Rico pa nga didto uban sa iyang mga barkada.

Nangita sila’g daplin nga makalingkud. Nagpadistansya sila aron magkasultihanay nga dili pinugngan ang tingog. Sa hilom nagpasalamat si Renante nga nag-brown out.

“Pwede ba nga ako nga maka-kiss sa akong girlfriend?” giingnan ni Renante si Gingging. “Sure,” matud ni Gingging nga gitaon dayon ang iyang nawong.

Wala sila’y kabalaka kay ngitngit kaayo ang palibot ug walay makakita sa ilang gihimo. Wala sipyata ni Renante ug sa lips dayon niya gihagkan si Gingging.

Sunod nga gihimo ni Renante mao ang paggakus sa dalaga. “Happy kaayo ko Ging niining pagbisita nako sa Catmon,” wala makapugong si Renante pagbutyag sa iyang gibati.

“Bitaw, apan may kinutoban ang atong kalipay kay molarga ka na man ‘sab,” may kasubo ang tono sa tingog ni Gingging. Nanghupaw si Renante. “Unsaon, motrabaho man gud ko sa dili pa ang klase para dili kaayo makagasto sila’s Mama ug Papa,” ni Renante pa.

Wala na gayud mosiga pa ang suga. Nagparayganay pa gayud sila si Renante ug Gingging. Taud-taud gipangita nila si Rico. “Mopauli na kuno’s Gingging bai Ric,” kuyugi lang si Gingging bai Ren kay mosunod ra mi ninyo si Nympha,” matud ni Rico.

Giagbayan ni Renante si Gingging samtang sila nanglakaw pauli. Matag karon ug unya, hagkan ni Renante si Gingging. “Huwaton nato sila si Rico ug Nympha,” ni Gingging pa dihang duol na sila sa daghang kabalayan.

Nangita sila og pwesto nga makapahimutang sila. Si Gingging maoy mitudlo nga adto sila sa lantay sa tindahan og bibingka sa iyang Tiya.

Ngitngit gihapon didto sa maong dapit ug makita ang mga tawo nga magdanga-danga gikan sa karsada nga ilang gigikanan.

Wala palabya ni Renante ang higayon. Gipatagamtam niya ni Gingging ang parayeg sa usa ka lalaki ngadto sa babaye. Nakasabot si Renante nga managsama ang ilang gibati ni Gingging niadtong higayona.

Nalantawan nila nga may nagdanga-danga... sila na si Rico ug Nympha uban sa ilang mga barkada.

“Kun makalugar ka gani Ging, suroy sa siyudad ha unya sa Biyernes sa hapon para magkuyog ta’g pauli dinhi sa inyo sa Cabungaan,” giingnan ni Renante ang dalaga, dayon gihagkan.

“Adtoa ko sa siyudad Ging para malipay ta’ng duha. Ikaw maoy akong himoon kapikas apan dili na ako buot nga mopas-an ka pa’g tubig kay adto ta sa siyudad mopuyo,” ni Renante. (Kataposan)