Misunderstanding

Dear Tita Salie,

Maayong adlaw. Tawga lang ko og Jai2x, 20 years of age, I am still single from Danao City, Cebu. Mangayo lang ko nimo og  tabang, Tita, nga imo unta ko pasabton.

Duna unta koy uyab apan bag-ohay lang mi nag-break, tawgon lang nato siya og Mr. N. Taudtaod usab ang among relasyon almost 5 years kami. Before mi nagbulag, Tita, adunay nanguyab nako nga si Mr. R. Daghan kaayo og promise si Mr. R nga kun kami ang magkadayon, dili gyod daw ko niya pasakitan, iya daw ko nga buhion ug maningkamot siya aron hapsay ang among pagpuyo nga dili mi maglisod. Nagtrabaho siya sa gawas-abroad siya, Tita. Apan wala gyod nako siya sugta kay dili gusto makasala sa akong boyfriend.

Pero karon wala na gyoy ayo ang among relasyon ni Mr. N. dili nako malipayon, kay kanunay na lang ko nga masakitan niya. Unya kanunay nga mag-send og message sa Facebook si Mr. R. Matud niya nga mag-wait ra siya kun kanus-a nako siya sugton.

Daghan na kaayo mi og naagian ni Mr. N. Ang problema lang niya kay mubo kaayo og pasensya mao nga permi ra ko masakitan, Tita, kay ako permi lang ko nga mosabot niya apan siya dili mosabot. Misunderstanding lang gyod ang hinungdan sa among panagbulag ni Mr. N.

What would I do, Tita? Buhian na lang kaha nako si Mr. N? Naglibog gyod ko. Palihog pasabta ko. Thank you very much and God bless.

* * *

Dear Jai-jai,

Aduna gyoy mga tawo nga luoran kaayo. Tungod sa ilang pagkaluoran maglisod na hinoon kita pagpakig-estorya kay dili na man kini moharong kanimo. Imbes nga estoryahan unta ang problema aron dunay pagsinabtanay, magpabilin na hinuon ang problema nga dili masulbad tungod kay dili na man maminaw ang tawong luoran, busa, ang mga problema sa relasyon wala gyoy kasulbaran.

Ang maong batasan nga pagkaluoran usa ka ilhanan sa pagka-immature kay ang matured nga tawo andam moatubang sa problema ug adunay intention nga maestoryahan ang isyu nga angay estoryahan.

Tabangi si Mr. N nga makat-on siya sa kinaiya nga kamaong mosabot sa sitwasyon. Kun dunay sitwasyon nga dili masabtan anaa siyay pasensya aron sulbaron ang problema ug dili talikdan. Kun nahigugma ka gyod kang Mr. N, pasabta siya pareho sa akong pagpasabot kanimo. Dapat open siya sa mga possibilities nga duna gyoy dili pagsinabtanay tungod kay managlahi ang prinsipyo sa tawo. Mas nindot ang give and take nga relationship. Nga kun makamao kang mohatag dapat kamao ka usab nga modawat kun unsay moabot.

Ayaw sugta si Mr. R tungod kay nagbulag namo ni Mr. N. kun imo siyang sugton dapat gugma ngadto kaniya ang hinungdan. Imo siyang sugton tungod kay nahigugma ka kaniya ug dili tungod kay naghuwat siya ug nag-away mo ni Mr. N, aron wala nay umaabot nga problema mahitungod nianang butanga. -- Tita Salie