Dili mamansin

Dear Tita Salie,

Have a wonderful day and hope everything is fine with you. Just call me Natz, single ug nag-eskula pa ko sa usa  ka sikat nga school sa Cebu. Dili lang nako isulti ang pangalan sa school ug ang matuod nakong pangalan kay mauwaw ko.

Nakabaton ko og hinigugma, Tita, nga taga dinhi ra usab sa Cebu. Tawga lang siya og Mr. F. Ganahan kaayo ko niya kay gentleman siya kaayo. Samot ko nga na-inlove niya dihang iya kong giingnan nga love kaayo ko niya ug nga seryoso siya sa among relasyon. Tungod sa iyang gisulti ako usab nga gipaningkamotan nga maseryoso ko ug nga ikalipay niya nga ako ang iyang gihigugma. Bisan pa man kun nagtungha pa ko apan ako gyod siyang gahinan og oras aron molig-on ang among relasyon.

Dihay usa ka higayon nga naabot ko sa ilang lugar ni Mr. F. Duna man god koy classmate nga pareho og lugar ni Mr. F. busa nikuyog ko sa akong classmate. Ug ako gyod nga nakit-an ang akong boyfriend didto sa ilang lugar. Apan na-surprise gyod ko, Tita, dihang nagkasugat mi kay wala man ko niya tagda. Dili man siya mamansin didto sa ilaha. Tinuod kaha nga love ko niya, Tita? Palihog pasabta ko. Thank you so much and  more power.

* * *

Hello Natz,

 Daghan ang mga posibleng hinungdan nga ang tawo dili mokaon. Tingali kun busog siya, tingali kun nagpuasa siya, tingali kun wala siyay gana kay nagsakit ang ngipon, tingali duna siya’y problema ug walay lami ang kan-on alang kaniya. Sama usab sa imong boyfriend nga daghan kaayo ang posibleng hinungdan nganong wala siya motagad kanimo. Tingali kun wala ka niya mailhi kay dautan siya og mata o kaha wala niya panumbalinga ang babaye nga iyang nasugatan, wala niya makita o maklaro ang imong nawong, kay wala usab siya magdahom nga moabot ka sa ilang lugar. Kanunay kining mahitabo, Natz, nga bisan kun hapit namo magkabangga sa imong amiga apan dili nimo siya mapansin kay lahi ang imong gihunahuna ug wala nimo siya makita. Nakita nimo nga may kasugat ka apan wala nimo panumbalinga kun kinsa siya.

Bisan usab nga nakabantay siya kanimo apan iyang gituyo nga dili ka tagdon kay tingali kon naglikay siya nga matsismis o mahibaw-an nga dunay uyab. Basin kondili mosugot ang iyang parents nga manguyab na siya. Mahadlok siya nga moabot ang estorya didto sa iyang pamilya. Mao nga aron malikayan iya lamang gitago ang inyong relasyon.

Mas maayo gyod nga ang imong boyfriend mismo ang imong pangutan-on kun unsay rason nga wala ka man niya tagda. Puyde usab nga mobalik ka sa ilang lugar ug imo siyang tuyoon pagpakigkita kun mao lang ba gihapon nga dili ka niya tagdon. Kay basin usab kun duna siya’y laing uyab nga taga didto lang sa ilang lugar.

-- Tita Salie