Ang kasugiran sa bata pa si Lapulapu

Naglingkod sa lingkoranang tumba-tumba nga ginama sa kawayan si Lolo Baresto ug nagkalingaw sa pagpabulhot sa aso sa iyang kuwako nga gialirongan sa nangyaka sa sawog nga mga bata nga nagpaabot sa kasugiran sa kinabuhi ni Lapulapu sa gamay pa kining bata.

Naandan na kining himoon ni Lolo Baresto sa mga adlaw nga walay klase sa paghatag og kalingawan sa mga bata nga naglakip sa iyang mga apo ug mga bata nga anak sa ilang silingan sa sitio Sudtonggan sanglit niadtong panahona wala pa man mauso ang  telebisyon ug computer.

“Nahala, “  ni Lolo Baresto human makapabulhot sa aso sa iyang kuwako nga gipaslakan og tinustos nga tabako. Gipaliraw niini iyang  mata sa pagsud-ong sa mga bata nga mahinamon na kaayong nagpaabot sa kasugiran sa kinabuhi ni Lapulapu nga giilang bayani sa mga Oponganon.

“Gitudlo ba  sa inyong tulunghaan ang kinabuhi ni Lapulapu sukad pa sa iyang pagkabata?” pangutana ni Lolo Baresto sa nag-alirong nga mga bata. “Wala Lo,” nagdungan sa pagtubag ang mga bata sa pangutana ni Lolo Baresto. “Kun mao,” ni Lolo Baresto pa nga misikad sa iyang mga tiil nga maoy hinungdan sa pagtuwangtuwang sa silya nga iyang gilingkuran. “ Si Lapulapu nga gianggaan sa iyang mga ginikanan og Opong,” nagkanayon si Lolo Baresto nga misugod na sa iyang kasugiran. “Daan na nga namatikdan sa ilang katigulangan sa Isla sa Maktan nga nagbaton og talagsaong hiyas  bisan sa gamay pa kining bata.” “Matinabangon ug buotan,” dugang pa niya  samtang nagtaltag sa agbon sa iyang kuwako. “Kugihan,  matinahuron sa iyang katigulangan sa isla  ug matinumanon sa sugo sa iyang  ginikanan.  

“Kanunay kining mangulo sa pagpasiugda og mga kalihokan nga makahatag og kaayohan sa kumunidad sama sa pagpanglimpiyo sa palibot ug pagpasiugda og paugnat sa kusog sa kabataan nga nagsilbi nilang kalingawan kaniadto sa ilang dapit sa isla sa Maktan.”

“Naglakip kaniadto sa ilang gikalingawan nga paugnat sa kusog mao ang pagpakig-away nga maoy gamiton ang  palwa sa saging nga maoy nagsilbi   nilang sundang.” Padayon nga pagsugid ni Lolo Baresto.

“ Gipakita ni Lapulapu iyang kadasig sa pagbansaybansay sa paggamit sa tanang matang sa hinagiban nga maoy hinungdan nga nahimo kining hanas sa tanang mga bata sa ilang dapit sa natad sa pagpakig-away.”

“Ang laing paugnat sa kusog nga ilang gikalingawan kaniadto mao ang pagpaharong sa kaaway nga mano-mano pinaagi sa pagpakigdumog,” dugang pa ni Lolo Baresto. “Si Lapulapu nga naghambin og talagsaong kusog mao kanunay ang modaug.”  “Ang mga bata kaniadto nga kanunay ikaharong ni Lapulapu mao ang iyang mga ig-agaw nga sila si Gun-ob nga naghambin usab og talagsaong kusog ug si Babag.” “Bisan magtinabangay pa si Gun-ob ug Babag sa pagpakigdumog kang Lapulapu apan dili gayod sila makabuntog tungod kay gawas sa iyang talagsaong kusog nga gihuptan,” nagkanayon si Lolo Baresto. “Utokan usab kini sa natad sa pagpakig-away.”  “Ang maong hiyas nga gipakita ni Lapulapu maoy naghatod kaniya sa pagtuboy sa iyang katigulangan nga maoy mahimong pangulo sa Maktan dihang nahingkod na iyang panuigon,” panapos ni Lolo Baresto sa iyang kasugiran. (Katapusan)