Wala kuhaa

Dear Tita Salie,

Have a wonderful day. Just call me Leo, dili pa minyo apan dunay anak.

Ang amahan sa akong anak atoa nagpuyo uban sa iyang mga ginikanan nga tua sa Bicol. Samtang ako ug ang akong anak ania nagpuyo dinhi sa Cebu. Maayo kaayo ang among sinabtanay kay nagkahigugmaay man gyud mi sa tinuoray. Among sabot nga samtang wala siya’y trabaho dili una kami mag-uban sa pagpuyo aron dili masundan ang among anak. Matud niya nga mohatag lang siya og sustento alang sa bata ug kun may trabaho na siya iya ming kuhaon dinhi sa Cebu ug iya ming dad-on ngadto sa ilang lugar sa Bicol.

Apan sa sige nako og paabot nga magpadala siya alang sa among anak wala man gyo’y niabot. Nilabay na lang ang pila ka bulan ug wala gyod ko’y nadawat gikan sa amahan sa akong anak. Unya karon giaway pa gyod ko sa iyang mama kay ngano kuno nga wala mi moapas sa iyang anak.

Naglagot gyod ko kay wala man gani mangita og paagi ang iyang anak nga makuha kami dinhi nga unta nagsabot man kami nga iya ming kuhaon. Kun muapas sab mi sa akong anak ngadto sa Bicol, nahadlok usab ako nga masaag unya mi kay wala pa ko kasulay og biyahe og layo.

Palihog tabangi ko, Tita, kun unsay angay nakong buhaton. Daghang salamat and more power.

* * *

Dear Leo,

Sa akong tan-aw mora og kuwang ang inyong communication sa amahan sa imong anak. Wala moy pagkumostahay kun naunsa na ang inyong kinabuhi samtang nalayo sa usa’g-usa. Dapat nimong masayran nga sa kaminyoon kinahanglan gyod ang kanunay nga pagsultihanay aron inyong mahibaw-an kun wala bay problema ang imong kauban. Magpangutan-anay kamo kun malipayon pa ba kamo sa inyong relasyon, ug unsay inyong mga plano aron mulambo ang inyong pamilya  ug magpabilin kining hapsay.

Kun nindot pa unta ang inyong communication dili mahitabo nga awayon ka sa iyang mama kay anaa man ang amahan sa imong anak nga maka-explain sa imong sitwasyon. Wala’y idea ang mama sa imong uyab kun unsay inyong plano hinungdan nga giaway ka niya. Ug dapat untang buhaton sa imong uyab nga panalipdan ka pinaagi sa iyang pagsulti ngadto sa iyang pamilya kun unsay inyong kasabotan.

Busa tawagi ang amahan sa imong anak ug pangutan-a siya kun unsay iyang plano kaninyo, ug padayona ninyo ang kanunay nga pagsultihanay pinaagi sa tawag o text aron klaro ug linaw kanunay ang inyong relasyon. -- Tita Salie