Ang tulo ka higala

Ang tulo ka higala nagpadulong paingon sa San Roque kay mga bisita sila espesyal sa panimalay ni kapitan JunCab sa pista sa iyang balangay isip mga alalay sa politika. Si Meloy nga may asawa apan duha ang kiringking pulos may mga anak. Biyudo si Dencio nga mokaon bisan unsa, samtang si Luis nga minyo sab ug maki-Diyos maoy tigpasidaan sa pulong sa Ginoo. Samtang nanglakaw sila sa dalan padulong sa panimalay sa kapitan nangutana si Dencio kay Meloy.

“Bay Meloy, nganong tulo man ka babaye sa imong kinabuhi....?” Pasiuna ni Dencio kang Meloy.

“Ang Ginoo nag-ingon: Lakaw kamo sa kalibutan aron magdaghan...!” Daling tubag ni Meloy ngadto kang Denio.

“Katulo liko diay ka...!” Biaybiay nga pamulong ni Dencio kang Meloy.

“Kun maoy inyong pagtoo, sige na lang....!” Matud pa ni Meloy aron way lalis. Sanglit duol  na ang balay ni kapitan JunCab, mibadlong si Luis ug nanghilum ang duha nga igo lang sab nga nagpahiyom.

Misugat ang kapitan sa tulo ka  imbitado sa ganghaan ug gi-abi-abi. Nakita sa tulo ang inasal, humba ug uban pang pagkaon nga giaray sa lamisa. Lakip na niini ang duha ka botelyang alak nga gikan sa Australya. May igsoon sa Australya nga maoy tigpadala’g gasa alang ni kapitan JunCab. Sa agda sa kapitan, gilungis dayon ni Dencio ang paa sa inasal dungan ang pagsawsaw sa sabaw sa humba. Nangaon ang tulo ka managhigala sa lamisa ug nagkulokabildo sa umaabot nga piniliay uban sa batan-ong kapitan. Giipis ni Dencio ang alak ilimnong espesyal sa baso nga way sagol ug dayon giyarok. Nahurot ang duha ka botelyang alak hangtod nga nangatorpe na ang sinultihan sa tulo. Taudtaod, nananghid nga mamauli na ug human sa pasalamat sa imbitasyon nanglakaw sila.

Sa naglakaw na sila sa dalan, gipikhan dayon ni Meloy si Dencio nga medyo nagpingoypingoy.

“Sa akong tan-aw..., hastang kaon sa inasal ug humba ni ‘bay Dencio. Mora’g way habas, (hik)...!” Pika ni Meloy kang Dencio nga mora sab nagkalibat ang panan-aw.

“Kalami sa inasal hastang humba, ahhh (hik)...!” Hapit masarasay si Dencio nga mitubag sa pika ni Meloy.

“Subadista diay ka (hik)...! Gidili ang inasal ug baboy’ng humba sa inyong tinuhoan (hik)...!” Dason nga pika ni Meloy. Si Luis nga namati sa lalis ni Meloy ug Dencio misalga sa pag-ingon:

“Kaming mga SAKSI....., mopasidaan kaninyo: Bantaye ang pulong sa Ginoo. Pagmata na kamo...(hik)!” Ug nanug-ab si Luis nga misulti.

“Ngano ‘bay Luis, nangatulog ba ‘mi...(hik)?” ni Dencio pa nga hapit sab magbansiwag ang tinan-awan.

“Tama na! Pulos ta busog ug nakainom pa. Mangatulog ta sa balay... (hik)!!!” Timang ni Meloy ug dayong agbay sa abaga ni Dencio. Hilum nga nanglakaw ang tulo ka managhigala pauli sa tagsatagsa nilang  panimalay gikan sa pista sa San Roque. (Kataposan)