Magdalena - Gula 30

“Tana, Maria,” agda ni Marcos dihang nakakanaog na kami sa taxi. “Mosulod na kita.”

“Taym pa. Nga-nganong nia man ko nimo dad-a dinhi?” Gipangutana ko si Marcos.

“Ngano man diay? Wala man bitaw tay buhatong daotan. Duna lang tay panagsultihan nga importante kaayo. Maayo diha sa sulod kay way makadisturbo nato.”

Wala ko motingog. Gikulbaan ko. Unya wala ko makatutol dihang iya kong giagbayan ug gidala sa sulod. Wala kami estorya nga misulod sa usa ka lawak. Gikulbaan ko’g maayo nga nanginit ang lawas. Wala ko kasabot sa akong gibati. Misulod kami sa lawak 303.

Bugnaw ang sulod sa lawak tungod sa gipaandar nga aircon. Pero gipaningot ko. Mora’g nahadlok ko kun unsa may mahitabo tali namo ni Marcos.

Dihang didto na kami sa sulod, gigunitan ni Marcos ang akong tuong kamot, namatikdan dayon niya nga namugnaw ko. Nangamig ang tibuok kong kalawasan.

“Naunsa man ka, Maria? Unsa bay nahitabo nimo?” Nakapangutana si Marcos.

“W-wa man, Mar,” matud ko. “Manggawas na ta dinhi.”

“Ayaw una,” niya pa. “Mao pa gani atong pagsulod, mogawas dayon ta?”

Wala ko motingog. Gigunitan ni Marcos ang akong duha ka abaga ug gipaatubang ako ngadto kaniya. -- Sumpayan pa