Beginner’s luck

Daghan ang nahibulong nganong sagad sa mga first timer nga modula’g kasino mudaog gayod? Nia ang tubag:

Ang first timer kun mosugal, ma-lamesa man o slot machines, kun modaug og gamay kontento na. Malipay na siya. Busa, moundang dayon. Matud nila, mao ni ang gitawag og: “Beginner’s Luck.”

Apan kun mobalik siya’g panugal, ang maong beginner’s luck hinayhinay nga mahanaw depende sa gidugayon sa iyang pagdula ug sa gidak-on sa kantidad nga gusto niyang dag-on. Kun kontento lang ang maong tawo nga mudaog og ginagmay sama niadtong unang nahitabo sa iyang pagsugal, dili gyud siya mapilde. Ang pangutana: Kun kontento na ba siya sa maong daog nga gamay?

Sa tinuoray lang, kun ikaw adunay puhonan nga P10T, unya payits na ka bisa’g moganansiya la’g one hundred pesos, segurado gyud nga modaug ka pirme. Apan hakog ang tawo. Pul-an siya nga ang iyang madawat mao ra gihapon kagamay. Busa, mosulay siya’g pataas sa iyang target nga dag-on. Unya kun mudaog mahigalam.

Pun-an na sab niya ang gidak-on sa kantidad nga gusto niyang maangkon. Apan sama sa antugon, adunay duha ka nawong ang sugal; May pilde. Duna poy daog. Di pwede nga sige lang ka’g daog. May tiyempo nga dimalason ka usab.

Gusto kang  mobawi? Nagpuno ka’g laing puhonan. Napilde? Puno na sab! Ang nakanindot  kay sa taastaas nimong lahutay, nabawi ang tanan nimong puhonan. Nakadaog pa gyud! Dinhi magsugod ang dakong krimen. Ang maong kasinatian maghatag og dakong confidence nimo nga bisa’g moagi na ka’g dakong pilde, basta may puhonan pa lang ikapuno, makabawi ra diay. Unya, makaganansiya pa. Busa, di na gyud kaantigo moundang kun gamay ray daog. Gusto gyud nga dako! Nalimot, nga ang balay adunay odds. Ug kini mao ang dili nimo kamaong modagan bisa’g nakadaog na. Resulta, in the end, China wins.

Kadto lang nakadaog nga wala na mobalik pagsugal ang tinuoray nga nakadaog. Pero kadtong namalik... pusoy, uy! Nawala sa hingpit ang beginner’s luck kay dili na man kontento mudaog og gamay.