Kainit sa Gugma

Gula 2

“Ang kainit sa adlaw maoy nahimong taytayan nga nagkaila kami ug ang imong pag-umangkon manang,” giingnan ni Reynante ang iyaan ni Fe Marie.

Mikatawa si Fe Marie nga nakadungog sa gisulti ni Reynante. “Balaknon ka man diay.” Igo lang mipahiyom si Reynante. “Pag-snack mo diha day, ikaw na la’y paghukad, naay binignit ug biko diha,” matud sa iyaan ni Fe Marie.

Bisan og busog na si Reynante, apan girespitahan na lang niya si Fe Marie nga abtik kaayo nga naghukad og ilang makaon. “Wala ka diay magdala’g kauban Fem aron dili ka magmingaw?” giingnan ni Reynante si Fe Marie.

Milingo-lingo si Fem. “Maayo ra man ‘sab nga wala ko’y kauban Rey kay kun duna pa, dili ko makapasilong nimo sa akong payong… dili unta kita magkaila.” Mipahiyom si Reynante kay nahuna-huna tuod niya nga ang pagpayong ni Fe Marie kaniya maoy nagsilbi nga taytayan sa ilang panag-amigo.

Human sa ilang snack, nananghid si Fem sa iyang Tiya nga mopauli na sa Carreta. “Ayo-ayo mo day, ipangumosta na lang ko ni Mama nimo,” matud sa iyaan ni Fe Marie. Naglakaw sila si Reynante ug Fe Marie paingon sa C. Padilla aron adto mag-atang og kasakyan.

“Nagtungha ka pa ba Fem?” ni Reynante pa. Gitug-anan ni Fe Marie si Reynante nga mitapos na siya sa iyang pagtoon kaniadtong Marso. “Kun mao na, pareho diay ta nga mao pa gayud ang pagradwar sa atong mga kurso?” matud ni Reynante.

Maestra ang gikuha ni Fem samtang criminology ang natapos ni Reynante. Nanakay sila og PUJ nga paingon sa dalan Colon. Gigunitan ni Reynante ang kamot sa dalaga sa dayon na niining saka sa sakyanan.

Mipahiyom si Fe Marie. “Nganong mipahiyom ka man dihang gigunitan nako ang imong kamot pagsaka ganina sa PUJ,?” nangutana si Reynante sa dalaga. “Kuan, nahinumdom man gud ko sa komedya nga ang lalaki kuno maayo lang kun ulitawo pa kay gunitan g’yud ang babaye pero’g maminyo na pasagdan na lang,” matud ni Fem.

Miapil na lang ‘sab pagkatawa si Reynante apan mihatag siya og gamay’ng pagpasabot. “Dili tingali ang tanang lalaki Fem ingon niana og batasan.” Dunay laing pasahero nga misakay ug napugos sa pagsibog-dikit si Fe Marie ngadto ni Reynante.

Gibutang ni Reynante ang tuo niyang bukton sa buko-buko ni Fe Marie. “Ayaw lang kaikog, sandig lang sa akong dughan para dili kaayo ka mahuot,” gihunghongan ni Reynante si Fe Marie nga milingi kaniya samtang nagpahiyom. - Sumpayan