My substitute lover

Medellin, Cebu

Pipila na ka gabii nga wala’y maayong kinatulgan si Ramon. Ang iyang gihunahuna mao ang iyang uyab nga si Jane. Kun kanus-a hapit na ang iyang birthday mao usab ang ilang panagbulag. Siya man usab ang angay basulon kay siya may nag-una-una nga makigbulag. Kinsa man pud ang malipay sa gibuhat sa dalaga kaniya?

Nagsugod kining tanan diha sa ilang pagbayloay og mga text messages. Ingon niini...

“Asa ka ron, Jane?”

“Dia sa amoa ... sa bay.”

Maayo kay imong gituman ang akong tambag.”

“Syempre. Love gud tika!”

Gitambagan man gud ni Ramon si Jane nga dili na motrabaho sa videokehan. Mitando ang dalaga ug misaad nga dili na moadto sa gitrabahoan. Tua kini magpuyo sa layo nga barangay.

Apan sa dihang gipangutana ni Ramon ang iyang silingan nga kauban ni Jane sa videokehan, mitug-an kini nga sige pa silang nagkauban. Mao nga iya dayong giteksan ang hinigugma.

“Ingon ka, wa na ka motrabaho. Naa man kuno gihapon ka!”

“Aw, mao man kaha?

“Ingon lang niana kasayon ang imong tubag? Bakakon.”

Ug wa na moteks si Ramon. Wa usay gikan kang Jane. Mao to nga kanunay na siyang mag-alindasay magabii. Ug sa dihang dili na niya maagwanta, siya na maoy miuna’g teks. Apan wa na gyod mobawos ang dalaga. Hangtod nga miabot na lang ang iyang birthday.

Bisan luya ang iyang lawas ning adlawa, mibakon lang gayod siya aron pagtuman sa iyang adlaw-adlaw nga obligasyon -- ang pag-deliver sa mga mantalaan ngadto sa iyang mga suki nga abot pa ngadto sa laing mga lungsod.

Pag-abot niya sa Medellin, samtang naghunong sa usa ka balay, dihay babaye nga miduol, sa tan-aw ni Ramon, dalaga pa kay batan-on man. “Kuya, puyde makapalit og newspaper?”

“Puyde kaayo!” daling tubag ni Ramon nga nakatutok og maayo sa babaye kay, gawas nga susama lang niya ang pangedaron niini, gwapa pa gyod.

“Unsa may imo, Miss?

“Banat News, Kuya.”

“Nganong kini may imong gusto?” samtang hinay niyang gibunlot ang mantalaan.

“Ganahan kaayo kong mobasa sa mga sugilanon parehas sa Wild Orchids, Intimate Moments ug mga tambag ni Tita Salie.”

“Mao ba? Unya asa man ka magpalitan og Banat News?”

“Di lagi pirme, Kuya. Kana rang makaadto ko sa Bogo.”

“Unya, gusto ka magsuki ta?”

“Sige, Kuya sige!” misanag ang panagway sa dalaga. “Pila man ang bayranan? Inadlaw o sinemana?”

“Aylag kabalaka sa bayranan. Ako ray bahala.”

“Hala, kalain ni Kuya. Di ko, uy!” misap-ong sa baba ang dalaga. “O, sige, bisan pila lang ang imong ibayad. Pero naay kondisyon.”

“Unsa man, bi?”

“Ila-ila una ta, unya tagaan ko nimo’s imong number!”

“Aw, wa man nay daotan! Pero sa usa pud ka kondisyon, Kuya, kay di ko mohatag sa akong number nga mahimutang kos peligro.”

“Unsa may kondisyon?”

“Ulitawo ka o minyo na?”

“Sus, kana ra diay! Pyur gyod nga ulitawo, naa ang Diyos sa langit!” Gikuros pa ni Ramon ang iyang duha ka tudlo. “O, unsa na ang imong tubag sa akong kondisyon?”

“Jessa akong ngan, Kuya.

Gitug-an pod ni Ramon ang iyaha, ug unya isigtunol sila sa ilang cellphone para makopya ang ilang tagsa-tagsa ka number.

Nianang pagka gabii, nagteksanay sila. Nitug-an hinuon ni Ramon nga birthday niya, ug dali ra kaayong naka-greet si Jessa nga ingon sa nakapasayaw sa kasingkasing sa ulitawo. Ug sa dihang matulog na unta si Ramon, dihay laing miteks kaniya. Apan wa  na niya tubaga kay, alang kaniya, wa na niya kinahanglana. (Kataposan)