Nibalik ka sa imong mga saad

Napanglantawan ni Ronilo nga dili lalim nga iyang panguyaban si Marjory tungod kay hilabihang ka gwapa niini. Ug maulaw siya, mao nga nagpatabang siya ni Mercy ang suod niyang higala.

“Mercy, nasayod ko nga higala mo ni Marjory mao nga tabangi ko sa akong problema tungod kay nahigugma ko niya,” matud ni Ronilo.

“Ako pa nimo Ronilo, sulaye og panguyab basin diay sugton ka,” tubag ni Mercy.

“Mosugot kaha na nako si Marjory nga pwerting gwapaha ra ba ana niya?” saysay ni Ronilo.

“Walay mawala nimo kun suwayan lang nimo og panguyab,” daling tubag ni Mercy.

Sa dihang na gabii na namisita si Ronilo sa dalaga kay iyang  ipabuhagay ang iyang gibati tungod sa dakong gugma.

“Marjory nasayod ko nga nahibawo ka sa akong tuyo, pero unsaon man nahigugma man ko nimo,” pahayag ni Ronilo sa dalaga.

“Ronilo, pwede ba nga ugma puhon tika tubagon sa imong gugma?” ni Marjory.

“Marjory, ugma puhon molarga nako sa laing nasud sa Saudi Arabia. Dili ka ba maluoy nga mouli ko sa amo nga poypoy ang abaga kay lagi wala sugta?” pamahayag ni Ronilo.

“Ronilo, kun sugton tika dili kaha ko nimo binuangan?” tubag ni Marjory.

“Marjory, sama ra gud anang musoroy ka sa laing lugar unya naa kay makita nga imong gikaibgan syempre mangandoy kang maimo,” pasabot ni Ronilo dalang hangyo nga dawaton ang gugma.

“Oo, gisugot na tika Ronilo, ug ampingi baya ni ang akong gugma kay higugmaon ko usab ikaw sama sa akong kaugalingon,” tubag ni Marjory.

“Marjory, salamat nga imo kong gisugot. Ang akong ikasaad kanimo nga gikan ko sa laing nasud nga manarbaho sa Saudi Arabia mouli aron mangasawa diha kanimo,” padayag ni Ronilo.

Sa didto na si Ronilo sa Saudi Arabia naningkamot aron matuman ang iyang gipangandoy nga maasawa niya si Marjory. Kay lagi usa man siya ka enhenyero nakatigom siya og daghang kwarta. Ug nisaad si Ronilo nga ikauban niya si Marjory hangtod sa kahangturan.

Sa gidugayon sa mga adlaw nga nanglabay gimingaw si Marjory ni Ronilo kay nagpaabot sa iyang mga saad nga mangasawa kaniya.

Usa ka hapon niana si Marjory naghinuktok  pag-ayo naghuwat kun kanus-a mopauli si Ronilo.

“Pssst .... Marjory, mangasawa nako nimo,” pahayag ni Ronilo.

“Uy!...Ronilo kuyawan man sab ko nimo kalit man gud kang niuli nga wala magpahibalo,” ni Marjory.

“Marjory, kadiyot lang kaayo moadto lang ko sa unahan kay anaa koy adtoon”, tubag ni Ronilo.

Apan nahibulong si Marjory kay wala  pa mobalik si Ronilo. Sa tanto niyang pinaabot may nibutho nga lalake ug babaye. Ug kwartahan ang pamarog niini ug nangita ni Marjory aron sa pagpahibalo sa nahitabo ni Ronilo.

“Marjory, ikaw ang hinigugma sa akong anak?” matud sa amahan ni Ronilo.

“Oo, ako, nahibulong man ko ni Ronilo nga diri pa man to ganina mao pa gyoy paglakaw,” saysay ni Marjory.

“Day Marjory, ayaw kaguol. Dawata ang kamatuoran. Nakasabot nako, kadtong nagpakita kanimo ka ganina usa nato ka kalag ni Ronilo aron sa pagtuman sa  iyang mga saad diha  kanimo. Kay sa laktod kalit ang panghitabo, naaksidente ang iyang gisakyan,” pasabot sa amahan ni Ronilo.

“Ronilo, mahal ko, ngano man, nga imo man kong gitalikdan. Pagkabuotan mo kinsay magdahom nga nibalik ka sa imong mga saad,” matud ni Marjory. (Kataposan)