I believe

Dear Tita Salie,

Maayong adlaw. Usa ko sa mga tigbasahan sa imong column, malingaw lang gyud ko mobasa sa imong mga tambag ug sa mga problema nga gipadala sa mga tawo. Nindot gyud kaayo basahon ang mahitungod sa kinabuhi labi na kay tinuod gyud kang tawo nga mo-deal sa mga problema ug dili plastik.

Tagoa lang ko sa ngalan nga John, 18 years of age. Nagproblema ko niining girl nga akong gipanguyaban karon. Daghan man gud kaayong mga kaila nako ug niining akong gipanguyaban nga kusog kaayong masuya. Mao nga maglisod na hinuon ko og diskarte. Mga suyaan gyud kaayo sila ug usahay maulaw na lang hinuon ko nga moduol.

Dili ko segurado kun duna ba siya’y feelings ngari nako, Tita. Basta ako crush kaayo nako siya ug ganahan ko niya. Ang ako lang namatikdan kay kun magsige ko’g kanta og “I believe” magsige ra gyud siya og smile nako samtang motupad ko niya. Igo lang siyang maminaw nako nga nagkanta ug mo-smile siya.

Kun mahuman nako og kanta, Tita, unya mosugod nako ug diskarte niya dili na man siya motingog, Tita. Wa ko masayod kun unsay iyang feelings nako. Nahadlok pud ko ug nanagana nga iya kong e-basted. What do you think, Tita, naa kaha siya’y feelings diri nako? Palihog pasabta ko ug tabangi ko kun unsay akong buhaton. Thank you very much and God bless you always.

* * *

Dear John,

Mas nindot pamation kun atong nakab-ot ang ambition ug dunay daghang mga trials nga atong naagian. Nagtimaan lamang kini kun unsa ta ka ligdong, unsa kaisog nga miatubang sa tanan nibabag kanato. Diha nimo mailhan ang imong katakos kun ikaw milampos human sa lig-on nga mga pagsulay nga imong gipukan.

Kining mga masuyaon mao kini ang mga obstacles nga dapat nimong pildihon. Kun tungod lang kanila mo-surrender na ka, ilhanan gyud kini sa imong kahuyang kay nagpadala man ka. Ayaw tan-awa ang mga masuyaon, maoy tan-awa kanunay ang kalamposan sa imong tinguha aron dili ka maapektohan kanila. Kay of course kun sila ang imong tan-awon ug magpalupig ka nila maglisod gyud ka pagtuman sa imong gugma.

Siyempre, mohilom gyud ang babaye nga imong naibgan kun imo na siyang diskartihan tungod kay seryoso na kini nga butang ug dili puwede bugal-bugalan. Kun mo-smile siya samtang nagkanta ka, nalipay siya ug nalingaw siya kanimo. Apan ayaw kalimti nga lahi ang butang nga dunay kalabotan sa gugma.

Ug aron imong masayran kun duna ba siya’y feelings kanimo, ipadayon ang imong pagpangulitawo. Aron imong masayran kun unsay anaa sa iyang dughan. Dili pa seguro siya makatubag nimo dayon kay iya pa kining gihunahuna kun andam na ba siya. -- Tita Salie