Moawas lang

Dear Tita Salie,

Maayong adlaw, Tita. Manghinaot ko nga walay kakulian sa lawas ang among maanyag nga magtatambag. Hinaot sad unta nga kanunay kang malipayon, Tita, ug dunay kalinaw sa panghunahuna.

Sikat kaayo ang imong column, Tita. Daghan gyod ang mobasa niini tungod kay makahatag man kini og lamdag sa mga tawo nga dunay kalibog sa kinabuhi. Manghinaot pod ko nga imo kong tabangan niining akong suliran. Ako gyong atangan ang imong tubag.

Ako diay si Jesamae, minyo sulod na sa upat ka tuig. 23 anyos na ko karon ug dugay na gyod intawon ko nga naghandom nga mabuntis. Usahay, Tita, abtan na lang mi og kalaay sa akong bana tungod kay wala man gyod mi makahimo og bata.

Matud sa uban tingali kuno kon us-os ko’g matris mao nga dili ko masudlan kun mag-contact mi sa akong bana. Unya disminoryahon pod ko, Tita, kun menstruation na ko. Mao ba kaha kini ang mga hinungdan nga wala ko mabuntis?

Kun mag-contact mi sa akong bana, Tita, daghan man kaayong moawas gikan sa akoa ug mobanaw lang kini sa ubos ug sa salog nga akong nahimutangan. Mora dili gyod mosulod sa ilawom, Tita. Nganong ingon man niini? Palihog pasabta ko. Daghang salamat sa imong pagtagad. God bless you all.

* * *

Good day. Kun maoy pagbuot sa kahitas-an wala gyod tay mahimo gawas sa pagsunod sa iyang gimbut-an. Mao bitaw nga usahay dili nato masabtan kay dunay daghan nga dili pa andam pero nabuntis dayon. Dunay mga kinawat-kawat ang paghimo apan nasudlan dayon, pero kadtong gusto na kaayong makaanak, andam na ug pinahimutang pa gyod ang paghimo wala hinuon tagai og bata.

Pero ayaw lamang wad-a ang imong paglaom tungod kay bata pa man kaayo mong duha. Busa dako pa kaayo mo og chance nga makabuo na gyod bisan usa lang. Ayaw wad-a ang inyong paglaom  ug padayon ang inyong pag-ampo ngadto sa labaw nga makagagahom tungod kay siya ang mas nasayod kun unsay   angay kaninyo.

Mas maayo usab kun magpatan-aw mog doctor aron gyod matino ang hinungdan niini. Tungod duna koy mga kaila nga susama kanimo og nasinati nga mora og walay mosulod nga sperm sa ilang bana tungod kay moawas lang sa iyang pwerta. Ug dihang gi-ultrasound didto pa nahibaw-i nga inverted ang iyang uteros. Ang lain nakong kaila wala sa babaye ang problema kun dili didto sa iyang bana. Dihang nagpa-check up sila nasuta nga dunay barikos ang itlog sa bana ug mao kuno kini ang hinungdan nganong wala sila ka anak. Pero puyde rang operahan ang bana.

Busa mas maayo gyod kun magpa-check up mong duha. - - Tita Salie