Ang tinuod nga Anti-Christ

Upper Canduman, Mandaue City

Unsa may ilhanan sa tawo o grupo sa mga tawo nga anti-christ? Kadtong supak o wa nituman sa mga pagtulon-an ni Jesukristo ang anti-christ. Ang mga pagtulon-an ni Jesus nga dapat maibabaw sa listahan, mao ni ang mosunod: 1) Paghigugma sa Diyos labaw sa tanan; 2) Paghigugma sa isig ka tawo sama sa kaugalingon; 3) Paghigugma sa kaaway; 4) Pagpasaylo; 5) Pagkamanggihatagon sa mga kabus; ug 5) Pagsakripisyo tungod ug alang sa gugma sa Diyos ug isig katawo.

Ang ilhanan sa tawo nga nahigugma sa Diyos, mao nga nahigugma siya’s iyang isig ka tawo. Kay matud pa, unsaon man nimo pagmatuod nga nahigugma ka sa Diyos nga di makita, kun di ka mahigugma sa tawo nga makita unya lalang sa larawan sa Diyos?

Daghang mga relihiyon nga nagdala sa ngalan ni Jesus, apan wa sa iyang pulong. Sa ato pa, wa nitahod sa iyang pulong. Kun wa nitahod, di supak. Busa, anti-christ. Kadaghanan nato di maluoy sa isig katawo. Kusog magdumot sa kaaway. Dili ka- pasaylo sa nasipyat. Di makatabang sa mga kabus. Dili magsakripisyo alang sa pulong ni Jesus. Ang tinuod nga sakripisyo ang paglikay sa mga dautang buhat.

Niingon si Jesus “Carry your cross and follow me.” Pas-ana ang imong krus ug sunod kanako. Daghang nagsunod ni Jesus ug nagdala’s iyang ngalan, pero wa magpas-an og krus. Nagpas-an hinuon og bulawan. Nangadatu. Kay kutob sa mga relihiyon nga namugna, ang mga leader o pangulo nila, naglunang sa kaadunahan. Unsa man nang pagpas-an sa krus? Dili gyud na literal ang pagsabot nga magpas-an gyud og krus. Ang gipasabot ana ni Jesus, nga magsakripisyo ka tungod ug alang sa pagsunod sa mga pulong ug kinabuhi ni Jesus. Unsa may sakripisyo anang tungod sa relihiyon, si Father, Pastor, Elder, Minister o Brother, naglunang sa tanang material nga kadatu?  Di ba angay unta ilang kadatu ipamahin sa mga pobre? Kay sumala sa James 1:27, ang tinuod nga relihiyon motabang man sa mga pobre.

Daghang relihiyon o grupo nga wa katuman sa mga pagtulon-an ni Jesukristo. Busa, tataw nga masabot ra nato kun unsang grupoha o kinsa ang mga anti-christ.