Maka-afford

Dear Tita Salie,

Maayong adlaw! Usa ko sa liboan nga nagsunod sa imong lindog. Nalingaw ko sa imong mga tambag ug ganahan ko nimo kay totoong tao ka talaga. Medyo prangka lang gamay pero para nako mas maayo kay deretso gyud ka sa punto ug wala nay liko-liko pa.

Kining akong problema mahitungod kini sa akong kasingkasing nga naglibog sa duha ka gugma. 2 man gud kining lalaki sa akong kinabuhi karon. Love kaayo nako ang usa apan ang problema kay wala man siya’y trabaho. Mas bug-at siya alang kanako.

Kining usa, Tita, medyo dili kaayo nako love pero may feelings sab ko niya. Duna siya’y nindot nga trabaho kay seaman man siya. Ug desidido pa gyud siyang makigminyo kanako. Nasayod ko nga maka-afford gyud siya mobuhi sa amo unyang pamilya ug iya gyung mahatag kanako ang tanan nakong kinahanglan.

Kun ang batasan ang tan-awon halos pareho ra gyud silang duha, Tita, pulos buotan. Mao nga naglibog gyud ko kun kinsa akong pilion nilang duha kay pareho usab silang dunay apan.

Palihog pasabta ko ug tabangi ko kun kinsay akong pilion? Thank you so much and God bless.

* * *

Maayong adlaw,

Mao kini nga moment ang crucial kaayo sa lovelife diin dunay kalainan ang atong pilian, ang gugma versus kuwarta. Kay matud pa sa kanta ni Max Surban, kun palabihon mo ang gugma kay sa kuwarta, basin mapasmo ka. Lisod gyud ang pagpili sa duha, lisod ang pagpakanaog og hukom. Kay kun atong hunahunaon ug pilion nato ang lalaki nga dunay kuwarta I am sure nga dili usab kita malipayon kun wala tay gugma sa atong gikatipon. Usahay makaingon ta nga mura og gidula-dulaan ta sa atong kasingkasing. Kun didto lang unta kini mopitik sa tawo nga maka-afford mobuhi nato kay dunay trabaho perfect na gyud unta ang maong gugma.

Wala na ba gyu’y paglaom nga makatrabaho kining lalaki nga tinuoray nimong gihigugma? Kun duna siya’y kursong nahuman dili na man seguro lisod alang kaniya ang pagpangaplay kay graduado man siya. Busa kun puyde i-encourage siya nga mangita og trabaho. Kun tinuoray siyang  nahigugma kanimo i-challenge siya nga magplano na alang sa inyong umaabot nga pamilya. Bahala’g dili dato basta dunay paningkamot molambo lang gihapon ang inyong pagpuyo. Bisan igo-igo lang ang kuwarta basta anaa ang tinuod nga gugma sa usa’g-usa. Kay mag-unsa man ang daghang kuwarta kun nag-antos kay napugos lang ka. -- Tita Salie