Single Parent - Gula 5

Sanglit probinsya ug tuyoon ang nahimutangan sa Coral beach resort nga giadtoan nila ni John ug Jessyl, sila ra g’yud tawon ang nagtikaw-tikaw didto.

Lingaw sila kay tin-aw ug lawom ang tubig sa dagat. Didto sila maligo ilawom sa kahoy’ng pagatpat. Nasigpatan ni John nga dunay nag-igdal nga gamot sa pagatpat nga nindot lingkoran.

Miuna si John sa paglingkod ug gisud-ong niya si Jessyl nga diha sa iyang atubangan. Misamot nga naglaway si John nga nagsud-ong sa lawas ni Jessyl nga porma kaayo tungod sa gisul-ob niini nga bathing suit.

“Dali, manglingkod usa ta diri sa gamot sa pagatpat Jess,” giagni ni John ang batan-ong single parent. Hinay’ng mitupad si Jessyl kang John. “Kun may makakita nato no, magtoo g’yud sila nga mag-sweetheart ta’ng duha,” matud ni Jessyl.

Mipahiyom si John ug gigakus niya ang hawak ni Jessyl. “Angay pa ba diay nga ikapangutana? Sweetheart na bitaw ta’ng duha,” dali nga tubag ni John.

Wala ‘sab g’yud mosupak si Jessyl nga gigakus siya ni John, mora’g sa hilom nakagusto ra ‘sab siya nga miparayeg kaniya ang lalaki nga matinabangon kaniya.

Milingi-lingi si John, mingaw kaayo ang palibot ug sigurado siya nga walay nagtan-aw kanila ilawom sa kahoy’ng pagatpat. Gipahugtan pa ni John ang pagakus niya kang Jessyl ug dayon iya kining gihagkan.

Tinuod g’yud ang giingon sa uban nga nindot g’yud ang usa ka babaye nga may kasinatian na sa lalaki kay dili na inosente sa pagparayganay. Misukol si Jessyl ug pakighinagkanay kang John. May pagka parat-parat ang ilang mga ngabil tungod kay basa pa kini sa tubig-dagat.

Misawom si Jessyl. Gisundan kini ni John ug didto sa ilawom sa tubig gihapuhap ni John ang lawas ni Jessyl sa wala pa sila motunga sa ibabaw. Pareho sila’ng duha nga nagpahiyom dihang nakahanggap na sila og lab-as nga hangin. Milangoy sila balik sa gilingkoran nila nga gamot sa pagatpat.

Wala nay pugong-pugong ang ilang pagparayganay samtang naglingkod sila sa gamot sa kahoy. Taga dughan kanila ang tubig sa dagat.

“Mingawon man lang ‘sab ko nimo John kun dili na kita magkauban kay buotan ka man kaayo nako,” matud ni Jessyl nga daw seryoso og tono sa iyang sinultihan.

May nahuna-hunaan si John. Gusto niya nga adto niya paraygan og maayo si Jessyl sa sulod sa cottage. “Tana, adto usa ta’s cottage para makakaon ta,” giingnan ni John si Jessyl.

          Apan pagsulod pa lang gani nila sa cottage, nakabantay na si John nga mora’g lain na kaayo ang iyang gibati. Giagbayan dayon niya si Jessyl ug gihagkan. (Sumpayan)