Ingon lang diay niana kasayon

Dugay nang may gusto si Fredo kang Fe apan kun naa na siya sa atubangan sa dalaga, moungot ang iyang dila busa igo na lang siya sa pagtan-aw.

“Unsaon ko kaha pagsulti kang Fe?” Pangutana niya sa kaugalingon. “Suod man unta ming managhigala, apan di man gyud ko makasulti.”

“Fred, suod man gyud mo si Fe,” matud sa higala niyang si Mario, “ipalihug ko’g hatag ini, bi.”

“Unsa man ni, bay?” sukna ni Fredo.

“Sulat na, Fred, akong panguyaban si Fe.”

“O, sige,” matud ni Fredo nga wala makabalibad sa hangyo sa higala. Kabalibaron unta siya, “Naghalhal man lang  ko,” ni Fredo sa iyang kaugalingon, “naunhan hinuon ko’s kagwang.”

Milabay ang pipila ka adlaw, nagkita sila si Fredo ug Mario.

“Nahatag nimo kang Fe ang akong sulat, Fred?”

“Oo, akong nahatag.”

“Unsa may sulti?”

“Wa man to motingog. Nagmud-ok man lang to.”

“Nia pay usa, Fred, palihug ihatag ni niya ug sultihi nga mamisita ko.”

Gidawat ni Fredo ang sulat ug miadto siya sa ilang Fe nianang gabii.

“Fe, niay sulat gikan sa akong higala,” ug gitunol ang sulat.”

“Ngano ka man, Alfredo, nga imo mang dad-on ang sulat sa lain nga wa man koy gusto nianang tawhana?”

“Unya, unsaon ko man ni kun di mo dawaton?”

“Kun dili mo iuli sa tag-iya, usapa na!” matud ni Fe nga napikal. “Ang sulat sa laing tawo mao man hinuon imong giseguro samtang ang imo wa pa gani nimo ikahatag.”

“Unsaon man nako paghatag nga wa man koy gisulat?”

“Sus, pagka-amaw gyud nimo! Kun wa kay ikahatag, nganong di ka man maghimo?”

“Tinuod ka, Fe?” ni Fredo nga daw di makatuo sa gisulti sa dalaga.

“Ambot lang nimo, Alfredo, kay dako ka na man. Mangutana ka pa gyud nako?”

Milingilingi si Fredo kun wala bay lain nga nagtan-aw nila. Dayong gunit sa kamot sa dalaga.

“May gusto ka usab nako, Fe?”

“Unsa may gusto nimo, ako pay mangulitawo nimo?” Mitindog si Fe aron mopahawa apan gipugngan siya sa  ulitawo.

“Fe, pasayloa ko sa akong pagka-burong, apan mahal ko ikaw. Mahimo bang makahalok ko nimo?”

“Unsa pa may imong gipaabot, Pasko? Sa Disyembre pa to!”

Wa na maglangan si Fredo. Gigakos niya si Fe, hugot kaayo ug gihagkan ang naghulat nga mga ngabil niini. (Katapusan)