Single Parent

Si John maoy mitambong sa gipatawag nga miting sa mga ginikanan sa mga tinun-an sa kinder 2 nga nagtungha sa usa ka public school dinhi sa dakbayan.

Gihilantan man gud ang asawa ni John mao nga siya ang napugos pagtambong sa miting. Gituki sa miting ang amotan sa mga ginikanan. Dunay mga inahan nga nagbagulbol sa luyo.

“Kamahal ‘sab anang P200 uy unya magpalit pa ta og isul-ob sa atong anak,” bagutbot sa babaye nga diha tupad ni John. “Gamay ra na ma’am kay kausa ra man sa usa ka tuig na,” iyang giingnan ang babaye.

Apan ang babaye mipasabot nga lisud kaayo ang kwarta karong panahona. “Single parent man gud ko, naninda-tinda ra man gani ko kun dia sa tunghaan ang bata,” matud sa babaye.

Gipasiklapan ni John ang babaye. Hitsuraan ang babaye ug bana-bana niya 20 o kaha 21 pa ang pangedaron niini. “Asa man diay ang papa sa bata?” gipangutana ni John ang babaye.

“Nalumos sa sabaw, ambut asa na,” mubo nga tubag sa babaye nga daw nangomedya apan wala magkatawa. Mikuot si John sa iyang pitaka ug mibunlot sa tibuok P500.

“Ibayad na ayaw na lang og reklamo,” hagawhaw ni John sa babaye. Dayon mitunol si John sa iyang P200 ngadto sa class treasurer ug migawas siya didto sa may pultahan.

Nagkalingaw si John og pakisulti sa ubang ginikanan ug iyang gikumbinsi nga dili na lang moreklamo kay total kalipay kini sa ilang mga anak ang maong kalihukan.

“Maayo ka man sir kay kwartahan man, kami tawon,” matud sa usa ka hamtong nga inahan. Takulahaw nga miduol kaniya kadtong babaye nga nagpaila nga single parent.

“Salamat g’yud kaayo nga naluoy ka nako sir ha, apiki g’yud tinuod ko sa kwarta. Dia ang imong sukli sir,” gitunol sa babaye kang John ang tulo ka tag usa ka gatus ka pesos.

“Imo na kana kay naglisud ka man kaha sa kwarta, tabang nako na nimo,” ni John pa. Giimbitar ni John og snack ang maong babaye sa canteen sa tunghaan.

Misugot ang babaye. “Aw, mas maayo nga adto na lang ta sa fast food restaurant sa atbang mag-snack kay mora’g samok ang canteen,” matud ni John.

Ang babaye maoy gipa-order niya og ilang makaon. Didto ra si John naghuwat sa usa ka bakante nga lamesa. Gisud-ong niya ang babaye nga wala pa gani niya mahibaw-i ang ngalan.

Kun isda pa, gihimbisan g’yud pag-ayo ni John. Gisud-ong gikan sa ulo ngadto sa iyang tiil. Hitsuraan ang babaye apan wala’y pangareglar sa kaugalingon. – Sumpayan