Nabiktima sa polis

Dear Tita Salie,

Maayong adlaw. Kini akong gipadala dili kini akong problema, problema kini sa akong amiga. Ako na lang ang mangutana kanimo niini tungod kay concerned lang ko kaniya ug naluoy ko niya.

Kining akong amiga dunay karelasyon nga usa ka polis, ug karon duna silay 1 kabuok anak. Nagka-friend pud mi niining maong polis, Tita.

Ang problema karon, Tita, kay naglikay-likay na man ang lalaki sa iyang obligasyon sa bata. Nisugot na lang unta ang akong amiga nga dili siya minyoan basta ang bata iyang suportahan. Mao gyod unta kini ang ilang kasabotan.

Pero taudtaod na nga wala’y balita ang polis. Dihang nakontak na nibalik na usab ang pagsuporta apan midagan lang kini og pila ka bulan ug wala na usab mosuporta ang maong polis, Tita.

Karon amo nalang nabalitaan nga duna na sad kini lain nga gikatipon ug biktimahon human iya mabiktima ang akong amiga. Gusto unta namong gukoron ang maong polis, Tita. Puyde ba siyang mapugos sa pagsuporta sa bata? Kinsa ug asa man mi moduol? Palihog pasabta ko sa angay nakong buhaton. Thank you very much and more power.

* * *

Good day. Kanindot sa kinabuhi kun duna kita’y amigo o amiga nga andam motabang kanato ug dili makaakong motan-aw sa atong kalisod. Dili pangitaon ang higala nga sama sa ingon. Pero kun kita buotan ug dunay pagpakabana sa uban ang ubang tawo mamahimo usab nga sama kanimo. Ipadayon ang imong maayong gawi, ug nasayod ko nga daghan usab sa imong mga higala o bisan dili pa nimo suod nga kaila gusto usab motabang kanimo sa ingon kasayon tungod kay nalipay sila sa imong kamanggihunahunaon.

Mao kini ang mga estorya nga kasagaran atong madunggan mahitungod sa mga  police, sundalo, army o mga seaman nga pang-chicks kuno kining mga tawhana.

May be tinuod apan dili sad tanan kanila pareho og binuhatan. Tungod kay duna sad mga alagad sa balaod nga buotan ug matinud-anon ngadto sa ilang partner, asawa o hinigugma. Apan kining uyab sa imong amiga dili gyod kini maayong ehemplo sa mga tawong atong gisaligan ug gilauman nga manalipod kanato. Mas angayan siya ibala o ipadala sa mga lugar nga dunay gira aron mahinayhinay ug kahurot ang sama kaniya.

Isumbong ninyo siya sa ilang labaw. Adtoa ninyo sa campo, puyde sa Camp Sotero ug adto mo pangayo og tabang, paagi kun unsay procedure nga buhaton kay inyong isumbong ang maong polis aron usab siya  hatagan og sanction ug ang imong  amiga makapangayo usab og suporta alang sa bata. -- Tita Salie