Ang public-private partnership projects

Gikabalak-an sa Alliance of Health Workers nga kining pag-privatized sa government hospital maoy mahimong hinungdan nga mawad-an sila’g trabaho. Supak kaayo sila sa gustong mahitabo sa gobiyerno.

Apan giklaro ni Presidential Spokesperson Abigail Valte nga sayop ang pagtuo sa Alliance of Health Workers. Dili i-privatized ang mga government hospital kun dili himuon kining public-private partnership projects. Gipasabot ni Valte nga dili paliton ang mga ospital sa gobiyerno sa pribado nga kompaniya. Sa ato pa, ang gobiyerno gihapon ang tag-iya sa maong mga ospital.

Ang nahitabo diay, dunay mga pribadong mamumuhonan nga interesado nga motabang sa mga government hospital pinaagi sa pagbutang og kuwarta aron kini ma-modernize. Usa kini ka modernization sa mga pasilidad sa maong mga ospital. Ug ang mahitabo niini, usa na ka korporasyon ang gihisgotang mga ospital.

Kun madayon kini, kinsa man ang adunay dakong kontrol sa maong mga ospital, ang gobiyerno ba o ang investors nga nagbubo og dakong puhonan aron mabag-o ang mga kagamitan sa ospital?

Kini ang angay tukion. Bisag dili ipa-privatized ang nahisgotang mga ospital apan mabalaka gihapon niini ang Alliance of Health Workers nga maigo sa maong katuyoan sa gobiyerno. May kahigayonan gihapon nga mataktak sila sa trabaho.

Bisa’g giingon sa Malakanyang nga ang maapektohang health workers ibalhin sa laing government hospital o kaha  patrabahuon sa DOH aron wala’y kawad-an og trabaho, apan dili gihapon kini usa ka kasiguroan alang sa maong mga trabahante.

Hinuon, ang kinabag-ang mga pasiyente man ang makapahimulos sa pag-modernize sa government hospital kay mabag-o ug kasaligan na man unya ang mga pasilidad ug ubang mga gamit sa ospital.

Kay sa pagka-karon ang ubang mga ospital sa gobiyerno minantinil lang intawon ang mga pasilidad ug dili makahatag og igong kaluwasan sa mga pasyente.