Gisuwerte si Loreto

Gula 2

Gidungan ni Loreto paghatag ngadto sa opisina ni Eddie Mata ang ilang dukomento ni Claire. Wala tuod mosipyat, paspas kaayo ang pag-asikaso sa ilang dukomento ug dali ra sila nga nahuman.

 â€œSalamat kaayo Lor ha? Kun wala ka pa nga amigo ni sir Eddie basin og madugay g’yud ko. Kanindot sa akong bag-o kaayo nga lisensya uy,” matud ni Claire nga nagpahiyom.

“Hapit na man alas dies, mag-snack ta Claire. Tua sa luyo sa building nako giparking ang akong kotse,” giingnan ni Loreto ang dalaga. “Aw duna ka diay kotse Lor?” ni Claire pa.

Misakay sila og misirit sa downtown sa Danao City ug didto sila nangita og dapit nga maka-snack. “Dili ka gusto mokaon sa lamian kaayo nila nga tinap-anan didto sa Dunggoan?” gisukna ni Claire si Loreto.

“Uy, kinaham kaayo nako na. Ikaw gusto ka?” bawos-pangutana ni Loreto sa gwapa niya nga bag-ong higala. Human sila makakaon, nagkalingaw usa sila og sultihanay.

“Asa ka pa diay karon Lor? Ako modalikyat ‘sa ko sa Cebu City kay paadtoon ko sa akong tiya sa Labangon,” matud ni Claire. “Mas labing maayo kay mosakay ka na lang nako balik sa Cebu City,”  dali nga tubag ni Loreto.

Sa sakyanan, gipatugtog ni Loreto ang kinaham niya nga mga music nga diha sa iyang CD. “Hala kanindot sa imong mga tukar uy, maka-in love man,” matud ni Claire nga nagpahiyom.

Gisakyan dayon ni Loreto ang gisulti ni Claire. “May boyfriend ka na ba Claire?” Wala dayon motubag ang dalaga… mora’g duna pay gihuna-huna.

Taud-taud. “Yes, duna na ko’y boyfriend Lor, apan two weeks na nga wala mi magtagad kay nasakpan nako nga nanguyab ‘sab siya sa akong amiga nga taga Carmen.”

“Kun mao nindot na nga balita para nako Claire kay basin og may purohan pa nga kun manguyab ko nimo imo ko’ng sugton,” sagol komedya ni Loreto kang Claire.

“Basin,” mubo nga tubag ni Claire ug gilingi ang ulitawo nga nag-drive sa kotse. Nagbayloay sila og mga contact numbers. Gihatud g’yud ni Loreto si Claire sa balay sa iyang iyaan sa Labangon. “Text lang unya ta Lor, babay!” matud ni Claire sa dayong kanaug sa kotse ni Loreto. Bisan og miaginod na ang kotse ni Loreto apan gilingi pa gayud niya ang bayhon ni Claire.

Mihunong siya sa unahan ug gi-save niya ang contact numbers ni Claire sa phone book sa iyang selpon. Wala siya magdahum nga makahimamat ning adlawa og maanyag nga babaye.

Alang ni Loreto, lahi ang kaanyag ni Claire. (Sumpayan)