Wala’y molabaw sa balaud, mao ba?

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Ang balaud, balaud. Kun unsay mga lagda nga naa niini, kinahanglan maoy sundon. Dili kulangan ug dili sab sobrahan. Kay sa higayon nga dunay mga kabahin niini ug bawogon, dili na kini balaud. Sanglit mahimo na man kining precedent, o sinugdanan nga ang patakaran magsige na la’g kabawog. Dapat fixed ang balaud. Dili mapalit sa salapi. Dili mokiling-kiling  sa mga singka sa kagamhanan. Ug kinahanglang lig-on ang pundasiyon...nga bisa’g linogon pa sa nagpungasing yawan-on bahandi ug gahom, dili ug dili gyud matay-og. Buwahan, magpabilin sa kanunay nga pareha ang sukdanan sa magkaatbang nga habig sa timbangan.

Ang balaud gigama aron adunay sumbanan ang tanan. Dili kini iyaha sa maghuhukom lang. Kun dili, iya sab kini sa gikiha ug nagkiha. Mao man gani, nga isip lungsoranon, dapat usa’g-usa kanato masayod sa tanang unod sulod sa balaud aron wala’y malupigan. Timan-i: Ignorance of the law excuses no one. Kay kun di ka magpakabana, basi’g mapriso lang ka bisa’g wala’y sala. Pipila na ba ka inosente ang naa sa bilanggoan kay wala masayod sa limitasyon sa balaud? Napriso sila kay wa makaalinggat nga ang hukom nga gipakanaog sa huwes milabaw diay sa gisunod nga balaud?

Ug mao kini ang nahitabo ni Gwen Garcia. Ang kaso nga gisang-at batok kaniya, 2010 pa. Unya, nganong 2013 man gipagawas ang hukom niini? Ang iyang amahan, si Kongresman Pablo Garcia, kinsa suheto sa balaud, nasayod nga human ma-imbestigahi ang kaso sa iyang anak niadtong 2010-2011, dapat may resulta unta kini gikan sa 60 ngadto sa 120 ka adlaw, human sa imbestigasyon. Apan nganong wala man kini buhata sa maghuhukom? Nganong gipaabot man kini’g 2012-2013? Pasko pa gyud! Bag-ong Tuig ug Sinulog! Fair ba?

Mao kini dakong rason nganong hangtod karon, wala gyud manaog si Gwen sa iyang opisina. Nakita man gud sa iyang Daddy nga ang tawong naghukom ingon sa milabaw na sa gilatid sa balaud. Hinungdan, nga mipetisyon sila. Mipayil og Temporary Restraining Order agi’g pakita nga wa sila makauyon sa gipakanaog nga hukom kay kini alang kaniya, dili makiangayon.

Wala ako mopabor ni Gwen! Isip nagpakabanang tawo ug lungsoranon, kinsa nagsubay sab sa atong balaud, gisakitan lang kong naghunahuna nga mahimo ra man untang taposon ang kaso sulod sa 120 ka adlaw, ug nganong gipaabot man kini’g 2 ka tuig kapin? Kinsa man diay ang magbuot? Ang balaud, o ang maghuhukom? Sa tinuoray lang kun fixed pa lang nga balaud ang gisunod sa maghuhukom, dili na mo-ik ang mga Garcia, uy! Pero ang nahitabo, kay wala man kini tumana? Giinat-inat man. Ingon, wala’y molapas o molabaw sa balaud? Unsa man diay ni?

Napanday kining artikuloha agi’g pagsupak sa sinulat ni Higalang Prescil I. Cañete nga napatik dinhi sa  Banat News niadtong Martes, Enero 22, 2013. p.7 nga nag-ulohan: ‘Walay molabaw sa balaud.’ Kay kun tinuod pa nga wala’y molabaw sa balaud, Bay, wala untay napriso nga mga buotan ug walay sala! Unya ang pait, kay daghang kriminal nga hangtod karon nagpabiling gawasnon, Bay. Sila....sila ang mga linalang nga milabaw pa sa balaud.