Dear Tita Salie,
Maayong adlaw kaninyong tanan nga tigbasahan sa column ni Tita Salie, ug labina kanimo, Tita. Hinaot nga anaa ka sa maayong panglawas kanunay.
Tagoa lang ko sa ngalan nga Cecille, usa ka minyo ug dunay 2 kabuok anak. Bag-ohay lang gyod ko nga nanganak sa akong ikaduha, ug dinhi nagsugod ang akong problema.
Sa akong pagpanganak niining ikaduha nako nga bata ang akong bana maoy nagparehistro sa bata. Ambot unsay nahitabo sa akong bana nga sayop man ang middle name nga iyang gibutang. Didto man ko nanganak sa hospital. Ug dihang ako na nga gikuha ang birth certificate didto na nako nasayran nga dunay sayop. Busa akong gibalik ang hospital aron moreklamo sa akong problema. Apan matud nila nga dili na gyod mausab ang rehistro kay ila na nga na rehistro ang bata. Kun unsay nasulat didto mao na gyod to. Matud pa nila nga ila gyod gipa-check permi ang mga nakasulat sa form aron wala’y problema. So, dili na nila sayopon kun duna may sayop sa mga pangalan, kay dili na gyod kini mausab pa.
Gusto nako nga i-correct ang middle name sa akong anak, Tita. Mas maayo nga gamay pa ang bata limpyo na daan ang iyang mga papelis. Asa man ko moduol kun akong ipa-correct? Palihog pasabta ko. Daghang salamat sa imong pagtagad. God bless you always. -- Cecille
* * *
Hello, Cecille,
Tinuod gyod nga once ma-forward na ang rehistro didto sa Local Civil Registrar mao na gyod kini ang mogawas didto sa Certificate of live birth ug wala nay paglaum nga mausab pa kini sa taga hospital nga imong gipanganakan. Mao gyod nga alang sa tanan nga nagparehistro sa ilang mga anak, palihog klaroha gyod pag-ayo ang inyong pagsulat sa mga informations nga pangayuon, labina ang pangalan sa bata, ang iyang apelyido ug middle name kinahanglan sakto gayod ang spelling tungod kay gamay ninyong sayop dako kining problema sa bata kun siya magsugod na og gamit sa iyang mga papers. Dili lamang ang sa bata lakip na niini ang pangalan, apelyido ug middle name sa amahan ug inahan.
Muadto na lang ka sa inyong Local Civil Registrar Office kun diin ka nanganak, pangitaa ang maong buhatan ug adto ka mo-file for correction sa middle name sa imong anak. Sa imong pag-adto ayaw kalimti pagdala ang Certificate of live birth nga sayop kay ila kanang tan-awon.
Mas maayo gyod nga karon pa lang imo nang andamon, lihukon ang correction tungod kay muabot gyod ang panahon nga iya na kanang kinahanglanon. Sa iya unyang pag-graduate sa iyang pagtuon pangitaon gyod sa eskuylahan ang maong document. -- Tita Salie