Goodbye is not Forever

Gula 73

Wala makasabot si Vanessa sa iyang kaugalingon. Ingon sa gilamat siya sa pagkalalaki ni Albert.

Miligdas ang daghang mga adlaw sa pag-alagad ni Albert sa call center. Sa iyang pagpauli usa niana ka buntag, gipangutana niya ang iyang inahan kun wala ba motawag si Vanessa sa telepono. Nagmatingad-on ang ulitawo kay lima na ka adlaw nga si Vanessa wala mosulod sa trabaho nga wala man lay diyotay nga pahibalo. Wala usab si Albert makatawag sa babaye tungod kay busy siya sa daghang giatiman.

“Wala man siya manawag,” tug-an sa inahan. “Ngano? Hain man diay siya? Wala ba diay kamo magkita didto sa trabahoan?

‘Lima na ka adlaw nga wala siya mo-report sa trabaho, Ma,” tubag ni Albert. “Giiliw na gani siya sa among mga kauban.”

Sulayi’g tawag sa telepono,” sugyot sa inahan. “Tingalig’g anaa ra siya sa ila ug may kakulian lang sa lawas.”

Gitan-aw ni Albert ang iyang inahan. Unya midali siya pagkuha sa selpon.

“Hello, Vanessa? Si Albert kini.”

“Uy, ikaw man diay. Nganong nanawag ka man?

“Nganong wala ka na man mo-report sa imong trabaho?” pakisayod ni Albert.

Wala’y tubag gikan sa pikas.

“Vanessa?” ni Albert pa. “Hello! Vanessa anaa ka pa ba?”

“A, o-oo, Albert,” tubag ni Vanessa. -- Sumpayan pa