Tsunami alarm

 Badian, Cebu

Samtang nagtinga si Allen, Amerikanong bana ni Maria, sulod sa private ward sa ikapitong andana sa Good Shepherd Medical Center ning dakbayan, nagkaguliyang ang mga tawo sa tibuok ospital. Dunay nagkurog nga tingog sa babaye  nga nag-anunsiyo “Don’t panic. Stay calm” sa public address system. Nanira sa pultahan si Alma, bayaw ni Maria pagsulod niya uban ni Rudy iyang kapikas. Nisugod og am-am ni Allen karong hapona si Rudy, manghud ni Maria.

“Give thanks to God for your life Allen. You have had a wonderful life and you know He is about to take it back,” ni Rudy samtang naghapuhap sa abaga sa pasyente.

Naghilak si Maria nga naghapuhap sa agtang sa bana nga luspad na. Ug lawom na og gininhawa. Daghang mga plastic nga tubo gikabit sa iyang bukton lakip na sa dextrose ug abuno sa dugo. May mga laing plastic nga alambre nga gikabit sa iyang dughan para pag-monitor sa kasingkasing.

Sa alas dose ganihang udto, dunay linog nga nitay-og sa ka-Bisayaan ug Mindanao. Didto abtig linog si Rudy sa ilang balay sa Talamban. Uban sa iyang kapikas ug apo nga si Fiona. Mga diyes segundos ang linog ug wa sila mahadlok kay hinay ra ang tay-og. Apan nitawag si Maria nilang Rudy ug Alma nga paanhaon dayon sa ospital. Kay di siya ka hukom kun unsay buhaton sa pasyente. Patabang siyag hukom kay matud sa doctor, dilikado na ang kahimtang sa pasyente.

Gihatud nila sa SOS Children’s Village si Fiona diin nagtungha og Kinder  2 ang bata. Apan wa dangti’g dugay gikanselar ang klase. Giteksan na lang ni Alma si Mary Anne inahan ni James, kaklase ni Fiona, nga ipadala na lang sa ilang balay ang apo. Kay tua pa sila sa ospital.

Multiple organ failure ang naaguman ni Allen. Di na motrabaho iyang kidney, atay ug baga tungod sa infection sa iyang aneurism. Ug samtang may buot pa si Allen, nisulti siyang Maria nga kun di na siya matabang, pasagdan na lang siyang mamatay. Di siya gustong mabuhi ginamit ang artificial life support, nga magpitik lang ang kasingkasing apan coma o vegetable na. Nipirma si Maria ug waiver nga gitistigosan ni Alma.

Niabot sulod sa private ward sila si Liduvina, Aging ug Ruben (sila’s Liduvina ug Aging mga ig-agaw ni Maria. Si Ruben ikaduhang manghod ug kinamanghurang igsoon ni Maria).

“Wa nay nisakay og elevator. Naglumba ang mga tawo’g saka ngadto sa ikanapulong andana sa  ospital. Hasta ang mga pasyente nga makalakaw pa. Ang mga tagtungod sa pasyenteng bardado nipugos og tulod sa ilang mga stretcher ngadto sa taas” ni Ludivina nga gikutasan.

“Unsa may gikahadlokan sa mga tawo?” ni Rudy.

“May tsunami kuno. Gisanapan na og tubig ang City Hall. Naa na kuno’s Colon ang tubig. Ang SRP gilunopan na” ni Liduvina.

Nilingi si Rudy sa may Fuente Osmeña. Daghang tawong nagdinaganay. Nanaka’g mga bilding.

“Oh my God!  It’s so painful!” siyagit ni Allen. Naglit-ad-lit-ad sa iyang gihigdaan.

“Accept the pain Allen. That mean’s you are still alive because you felt the pain,” am-amni Rudy. Gianinaw ni Allen ang mga nanag-apong niya.

Puro niya suod sa kinabuhi. Sila si Liduvina ug Aging kusinera ug labandera nila sa Mandag-um, Badian. Diha na’s Allen puyo pagretiro niya sa trabaho sa Amerika isip building contractor. Si Ruben iyang drayber. Si Rudy iyang tig sa mga papeles kay CPA-lawyer. Si Alma pinangga niya kay maayong moluto og spaghetti kun masuroy sila’s Talamban.

“I want to thank you all for every thing. I consider myself so lucky to have you guys who love and support me. Goodbye to you all,” ni Allen. Ug nilawom na pag-ayo iyang gininhawa.

“Take care, Maria. We already said our goodbyes earlier,” ni Allen nga nikawat pa og halok sa aping ni Maria.

Nitulo ang luha ni Maria nga nagpadayon og hapuhap sa ulo sa bana. Wa lang sila’y anak kay nabaog si Allen sa iyang sakit pagminyo nila bayente ka tuig na ang nakalabay. Setenta i dos na ang edad ni Allen karon.

“Kaignorante ba sang mga tawhana!” ni Rudy. “Di diay tinuod nga may tsunami?” ni Aging. “Matud sa doctor nga akong nahinabi ganiha, ang epicenter sa linog tuas Tayasan, Negros Oriental. Ang dagat didto sa Tanon Strait. Kun may tsunami, adto ra didto. Di mahitabong motabok ang tsunami sa Bohol Strait. Ang siyudad sa Cebu nag-atubang sa Bohol Strait,” ni Rudy. Nakapanghupaw si Ruben.

“False alarm ra gyud diay to,” ni Liduvina. Namahid sa singot. (Kataposan)