Na tear off

Dear Tita Salie,

Have a wonderful day. I am an avid reader of your column. Kami tanan diri sa amo trabahoan mahilig kaayo mobasa, Tita, wala gyod pasipyaton kay mora og naadik mi sa imong column.

Ako diay si Meh, usa ka cashier sa usa ka department store dinhi sa Cebu. Last February man god, Tita, gi-confirm sa ako kauban nga dunay 1 ka resibo nga na-missing. Gi-tear off paglain ang resibo, tita, during the time gyod nga ako ang in-charge as cashier. Wala gyod ko kabantay nga nalaksi ang resibo ug ang 3 pa gyod ka copies. Kay ang resibo namo 3 copies man ang original adto sa costumer ang 2 ari namo.Pero ang 3 man gyod ka copya, Tita, ang na-missing.

Five years nako nga nagtrabaho, Tita, ug nagtinarong gyod ko tungod kay duna koy 3 ka mga estudyante nga highschool ug college ug usa pa nagtinarong gyod ko sa akong pagkatawo. Pero wala ko’y mahimo kay diri nako ang number sa maong bundle sa resibo ug ako ang in-charge ato nga time.

Gipatawag ko sa among HR ug head sa department store, Tita. Ug wala gyod ko’y masulti tungod kay wala gyod ko kabantay kun asa ang maong resibo. Gipatawag ko sa among legal counsel ug giingnan nga dili mabalik kay wala man sila’y ebidensiya. Ug ila kong gibalhin sa laing department.

Gisakitan lang ko nga ila kong gipasanginlan, Tita, nga limpyo gyod ang akong konsensya. Unsay akong buhaton? Palihog ayaw lang i-print akong number kay maulaw ko sa akong mga kauban nga sige ra ba sila og basa sa imong column. Daghang salamat. -- Meh

* * *

Dearest Meh,

Dili ko maka-blame kanila kun pasanginlan ka sa na-missing nga resibo tungod kay anaa man sa imong booklet ang maong numero sa resibo kauban kini sa mga resibo nga imong giisyu. Ug nahanaw ang maong resibo atol gyod nga ikaw ang naka-duty. Kinsa man diay ang unang tawo nga manubag niini? Walay lain kun dili ikaw gyod ang unang pangitaan.

Busa ayaw na paglagot kanila tungod kay duna silay rason. Ug kay wala man gyod kay nabuhat nga sala ug limpyo man ang imong konsensya ayaw na kini hunahunaa ug pasagdi nga sa pagpanglabay sa mga adlaw ug bulan imo ra kining makalimtan.

Maoy atimana ang imong trabaho, ang bag-ong department nga ilang gibutangan kanimo. Ug bantayi pag-ayo ang imong  resibo aron dili na mausab ang nahitabo. Kay tingali unya kun dunay nasuko kanimo ug iya kining gituyo pagbuhat aron ikaw ang pasanginlan. -- Tita Salie