Motuo ka’g dili (Matag Domingo) Gipatakdan pagka-ungo gipatambalan

Nahibulong ang magtiayong Juliana-David sa gipakitang lihok sa ilang anak dalaga nga si Elena. Mora’g kanunay na lang maghinuktok ug mokalit lang lakaw nga mora’g magdalidali. Kausa nakita nila kining misuka ug dayon mihana og katkat paingon sa ilang bulada. Kun pangutan-on kun unsay nahitabo kaniya, mosiga lang ang mga mata.

“Naunsa man kini si Elena, uy, David. Mabalaka man lang ta nganong dili na man kana siya magpuyo. Karon lang tua na sad siya sa may ilawom sa kahoy ug nagsige’g yawyaw. Wala ba kaha intawon siya malisoi sa pangisip.

“Sukad ra ba nga nagkuyogkuyog siyang Magda nga anak nilang Andoy-Ines, ingon na karon si Elena niini. Di ba gidungodungog man kana si Ines, David, nga kaliwat og ungo. Taga isla ang ilang kagikan, sa isla Pulang Langit,” nadako ang tingog ni Juliana.

Paglabaw sa duha ka semana ila nang makita si Elena nga manaog bisan sa kangitngit sa gawas panahon sa kagabhion. Ug dihang ilang gisunod, ilang nasaksihan nga mora’g gipaod ang ulo niini sa may punoan sa atis.

“Nay, Tay, dili na ko kaagwanta, ug labihan ka sakit sa akong ulo, nga mora kog ituboy sa itaas. Naunsa man ko, uy, nga naingon man ko ini,” ni Elena pa nga mora’g nagtuwad ang porma kay gisakitan sa iyang ulo.

Ilang gipatambalan si Elena og usa ka inilang albularyo dinhi sa ilang balangay -- si Ingko Apyot. Gisultihan sila ni Ingko Apyot sa kahimtang karon ni Elena nga kini gipatakdan pagka-ungo.

“Mao ba diay, Ingko Apyot,” ni David pa nga gibati’g kabalaka sa gisulti sa tambalan nga tiguwang.

“Ayaw lang mo kabalaka, kay maayo ra kini siya, duna koy tambal ini, paimnon ko siya’g sumpa sa patakod. Ugma, iyang isuka ang pagkaon nga naa karon sa iyang tiyan nga gipakaon kaniya aron siya matakdan pagka-ungo. Ug kay dili man ninyo kaliwat pagka-ungo, ang mahitabo lagmit mabuang ang inyong anak, Juliana...David...” sa tiguwang pa.

Bag-ong tuig na, ug malipayon karon sila si Juliana ug David kuyog ilang tulo ka mga anak. Ilang gisugat ang Bag-ong Tuig nga tugob sa Bag-ong Paglaom sa umaabot pang adlaw.

Happy New Year, Tay, Nay,” timbaya ni Elena sa iyang mga ginikanan. “Abi nimo, Tay, Nay, sila si Magda ug iyang pamilya namalhin na’g puyo, tua na sila mamalhin sa isla Pulang Langit, mao nay gisulti sa ilang silingan...”

Pagkabati nilang Juliana ug David gibati nila ang tumang kalipay kay wala na ang nagpatakod sa ilang anak, ug karon hingpit ang ilang panagtapok karon ning pagsugat nila sa Bag-ong Tuig. (Kataposan)