Batang Yagit Gula 4

Mibalik si Ramon sa giparkingan sa iyang kotse didto sa Gorordo Avenue. Iya gihapong nalantawan ang mga bata nga kauban sa anak ni Nelsa nga nanaygon sa karsada.

Nakapanglingo-lingo si Ramon nga naglantaw sa maong mga bata nga mibutang sa ilang kaugalingon sa peligro. Misakay si Ramon sa kotse ug mipadagan paingon sa iyang opisina.

Sa hilom, nakadayeg si Ramon sa kaanyag ni Nelsa. Iyang nahuna-huna nga bisan gani og nagkalkag ang iyang buhok, apan milutaw gihapon ang kaanyag ni Nelsa nga unta kuwang siya’g tulog.

Nakahuna-huna si Ramon nga inigka-gabii, iyang bisitahan si Nelsa didto sa iyang trabahoan sa sikat kaayo nga Wildflower Bar nga mibukas na diay usab pagbalik diha sa Sanciangko.

Tuod, paspas kaayo ang pagtuyok sa orasan. Miabot ang gabii. Mipauli si Ramon sa ilang balay ug naligo, nagpahumot ug milakaw aron sa pag-adto sa bar nga gitrabahoan ni Nelsa.

Mihapit usa si Ramon sa usa ka ATM booth ug mi-withdraw siya’g igo-igo nga kantidad aron magamit niya niining iyang lakaw. Lapas na sa alas 9:30 sa gabii siya nga miabut sa bar nga gitrabahoan ni Nelsa.

Pagkanaug pa lang ni Ramon sa kotse, gisugat dayon siya sa usa ka mahuyang ug miabi-abi kaniya. Giubanan si Ramon sa maong mahuyang pagsulod sa bar. Nagsugod na diay ang pagsayaw sa mga dancer.

Didto milingkud si Ramon sa lamesa duol sa counter kay ukopado na ang mga lingkoranan atubangan sa stage. “Gusto ka’g dunay katibol nga babaye sir?” matud sa mahuyang nga nasabtan ni Ramon nga maoy floor manager.

“Taud-taud lang, mosinyas ra ko. Palihug lang ko’g duha ka botelya sa beer,” giingnan ni Ramon ang floor manager. Giliraw ni Ramon ang iyang mga mata, gipangita niya si Nelsa.

Wala niya makit-i si Nelsa, wala lang ‘sab siya mangutana sa mga waiter kun miabut na ba ang dancer nga iyang gipangita. Nahuman ang dancer sa iyang pagsayaw ug higayon na nga pulihan kini’g laing dancer.

Mitugtog dayon ang sikat nga tukar – ang Gangnam Style. Mihugyaw pagpakpak ang mga customer dihang migawas na sa pultahan ang dancer nga nag-ikid-ikid na daan samtang nagsibog paingon sa tunga sa stage.

Mao diay nga gipakpakan pag-ayo sa mga customers kay gwapa kaayo ang maong dancer. Wala makapugong si Ramon sa pagginhawa’g lawom kay si Nelsa diay ang maong dancer.

Nakapahiyom si Ramon nga nagsud-ong ni Nelsa. Misamot siya pagdayeg ni Nelsa tungod sa iyang talagsaong kaanyag. Wala g’yud siya mosipyat sa pagtan-aw niya kaganinang buntag nga bisan og nagkalkag ang buhok niini, apan milutaw gihapon ang iyang kaanyag. (Sumpayan)