Goodbye is not Forever Gula 50

Gipasigarbo gyud ni Albert ang iyang hinigugma nga si Josheba sa iyang mga kauban sa call center.

Apan lahi ang pagsabot ni Vanessa sa gibuhat ni Albert. Alang kaniya, nagpasabot kini nga dili dako ang tinguha ni Albert sa katinud-anay sa ilang relasyon ni Josheba. Niini, natawo ang usa ka plano sa hunahuna ni Vanessa. May gamay nga gawong sa kahigayonan nga iyang nakit-an. Iya kining pahimuslan. Mohimo siya’g lakang. Mangita siya’g paagi nga mapansin o matagad siya ni Albert. Crush ni Vanessa ang ulitawo sukad pa niadtong first day niya sa trabaho sa call center.

Gaan gyud kaayo ang iyang buot ngadto sa ulitawo bisan sa unang higayon sa ilang panagkaila. Ug kini namatikdan usab sa ilang mga kauban sa call center.

Si Vanessa maoy hingpit nga hulagway sa usa ka modernong babaye sa kabag-ohan. Sa pagpangarte, sa uso sa panapot ug sa style sa kinabuhi, ang gisagop sa dalaga pulos binag-o.

Usa ka adlaw niana, sayo sa buntag sila migawas sa trabaho, nagkasabot ang grupo nga mangaligo sa usa ka beach resort sa lungsod sa Moalboal. Nindot ang lugar nga ilang giadtoan. Lapad ug hinlo ang baybayon nga nag-atubang sa tin-aw’ng dagat. Desente ug haom sa sama kanila nga mga propesyonl na. Mi-rent sila og cottage.

Gumikan sa kadaghan sa nangaligo sa luag nga dagat, ang mga kauban sa grupo nagkabulag. Wala tuyoa, sila si Vanessa ug Albert ang nagkauban. -- Sumpayan pa