Goodbye is not forever

Gula 49

Gitambagan si Albert ni Josheba nga maglingaw-lingaw siya samtang naghulat sa pagpauli niini dinhi sa Pilipinas. Nga ang duha ka tuig dali rang matapos ug dili lang hibaw-an nga magkita na sila pag-usab.

Naka-smile si Albert human mabasa ang email sa iyang hinigugma. Nalipay siya -- nga maayo ang kahimtang ni Josheba didto sa Canada.

Apan kalit lang usab mikisdom ang iyang nawong ni Albert. Kalit lang misantop sa iyang hunahuna nga bag-ohay pa lang si Josheba didto sa Canada. Nakapangutana siya sa iyang kaugalingon kun nunot sa pagpanglabay unya sa panahon wala bay mahitabong kausaban sa kinabuhi ni Josheba nga posibleng makaapekto sa ilang relasyon? Ug wala lang tuyoa, mikusog ang butokbutok sa iyang dughan.

Apan lagbalay sa pipila ka gutlo, inanay lang usab nga mihayag ang iyang panagway. Gipatuo niya ang kaugalingon nga tumanon gyud ni Josheba ang tanang mga saad niini.

“Sultihi siya nga dili usab siya angay mabalaka bahin nimo,” sugyot ni Vanessa, ang bag-o nilang kauban sa grupo. Siya ang labing guwapa sa tanang babaye nga kauban ni Albert sa call center. Ug duol sa iyang kasingkasing ang ulitawo. “Ingna nga daghan ka nag kaila dinhi ug malipayon ka uban kanila, aw, kanamo diay.”

Gipabasa ni Albert ang email ni Josheba ngadto sa mga babaye nga iyang mga kauban sa trabaho, sa cell center. Alang kaniya, wala’y daotan niadto. Mas maayo hinuon nga masayod sila nga nakagapos na ang iyang kasingkasing sa dalaga. -- Sumpayan pa