Bata’ng yagit

Miiknat ang kilay ni Ramon samtang nagmaneho siya sa iyang kotse tungod kay mikalit lang pag-ambak sa usa ka PUJ ang usa ka bata nga nanaygon ug nangayo’g kwarta sa mga pasahero.

Diriyot gayud madam-agi ni Ramon ang bata nga sa iyang tan-aw, singko-anyos pa ang pangedaron. Nagpangagot ang bag-ang ni Ramon sa kalagot kay kun nadam-agan pa niya ang bata sigurado nga daku kaayo ang iyang problema.

Midagan ang bata sa daplin sa karsada. Mipadayon ra usab si Ramon sa pagpadagan apan pag-abot sa unahan  nakahuna-huna siya nga balikon niya ang bata. Giparking ni Ramon ang iyang kotse daplin sa karsada.

Gilantaw ni Ramon ang mga bata nga nagsugod  na usab pagsugat sa mga sakyanan  nga mohunong sa eskena atul nga stop ang signal. Mibarug si Ramon daplin sa karsada ug gipanid-an niya ang kalihukan sa maong mga bata.

Ihap-ihap ni Ramon, mga lima ngadto sa unom ka bata ang magpundok sa eskena Escario ug Gorordo Avenue. Paglarga sa mga sakyanan, naglumbaanay na usab ang mga bata paingon sa daplin sa karsada. Swerte kay diha mipaduol sa iyang nahimutangan kadtong bata nga diriyot madam-agi sa sakyanan ni Ramon. Bulingit ang hitsura sa maong bata apan  pution kini. Natan-aw ni Ramon  nga wala lay kaligo ang maong bata mao nga bulingit tan-awon.

“Daghan ka na’g  natigum dong?” gipangutana ni Ramon ang bata. Wala magpaila si Ramon nga siya kadtong drayber sa awto nga diriyot makadam-ag sa bata aron dili kini mahadlok.

Wala motingog ang bata sa pagpangutana ni Ramon. Igo lang kini nga mihangad kaniya  ug mibukhad sa iyang kamot  ug gitunol sa atubangan ni Ramon. Gikuot ni Ramon ang sensiyo sa iyang bulsa ug gihatagan og duha ka tag singko pesos ang bata.

May nahuna-hunaan si Ramon ug kini mao nga sukit-sukiton niya ang bata. “Hatagan ko pa ikaw og daghang kwarta dong, daghan man ko’g  kwarta, apan tubaga ko sa akong pangutana,” ni Ramon pa nga nagngisi aron paghigala sa bata.

“Unsay imong ngalan dong… tawga lang ko og Uncle Ramon,” giingnan ni Ramon ang bata dungan sa paghapohap sa iyang buhok. Miduol usab kang Ramon ang laing bata og gitunolan ‘sab niya’g dos pesos.

Milakaw ang bata nga wala gani magpasalamat. “Datu  ka diay Uncle?” matud sa bata nga nagduwa-duwa sa sensiyo nga gihatag ni Ramon kaniya. Mipahiyom si Ramon nga nakadungog sa pangutana sa bata, apan  igo lang siya nga milingo-lingo.

“Unsay imong ngalan dong?” giusban pagpangutana ni Ramon ang bata. (Sumpayan)