Broken Heart

Taud-taud, nangabot didto sa private room ni Japhet ang daghang mga bisita. Nasabtan ni Stephanie nga mga kawani sila ni Japhet kay nagtahud man g’yud kaniya og sir. Namiya ra usab hinoon sila dayon.

“Ang rason nga magkuha ko og special nurse nga makaatiman kanako Step tungod kay single na ako karon human nga nagkabuwag kami ug ang akong asawa,” pasabut ni Japhet ngadto sa nurse.

Gisugilon ni Japhet kang Stephanie kun nganong nahimo siya pagbalik nga ulitawo human sa iyang pagkaminyo. Nalooy kaayo si Stephanie kang Japhet basi sa iyang gitug-an. Batan-on diay ang asawa ni Japhet ug miuban kini og laing lalaki.

“Human ko gitalikdan sa akong asawa Step, wala ko mahimutang ug gisudlan nako ang bisyo sa paghubog-hubog. Wala na ako makaatiman sa akong negosyo ug maayo gani kay duna ko’y buotan nga manager, kadtong dinhi kaganina, nga mibanos sa akong katungdanan,” luhaan ang mga mata ni Japhet nga misaysay sa iyang kaagi.

Gipikpik ni Stephanie ang buko-buko ni Japhet ug giam-aman nga dili lang magpadala sa iyang kaguol. “Makadaut kanimo ang pagsigi og huna-huna sa imong kaagi Japhet. Makakita ka pa’g laing babaye nga tinuod nga momahal kanimo,” giingnan ni Stephanie si Japhet.

“Maayo unta kun matinuod ang imong gisulti Stephanie. Walay kapuslanan ang akong katigayonan kun wala ako’y babaye nga ikauban sa kinabuhi,” matud ni Japhet.

Gitambagan ni Stephanie si Japhet nga mopahuway usa kay susihon niya kun unsay mga instruction sa doktor alang kaniya. Basi sa instruction sa doktor, gipainom niya kang Japhet ang mga tambal para sa maong oras.

“Dili kaayo ka mahasol Step kay dili man g’yud ako masakiton nga imong atimanon. Mga vitamins ra kanang gipang-resita ni Dr. Vincent kanako,” matud ni Japhet. Mibathay ang pahiyom sa panagway ni Stephanie ug nasawod kini kaayo sa panan-aw ni Japhet.

Nakabantay si Stephanie nga milad-ok og laway si Japhet ug gipaak ang kaugalingon niya nga mga ngabil samtang nagtan-aw kaniya. Miduko si Stephanie ug nagpatoo dunay atimanon sa mga gipangresita sa doktor.

Pagsulod balik ni Stephanie sa room, nakatulog na si Japhet. Iya kining gitutokan pag-ayo ug naisip niya nga sayop ang asawa niini nga mibiya sa iyang bana kay ambongan kini og panagway. Bisan sa iyang pangedaron apan milutaw gihapon nga hitsuraan si Japhet.

Aron malingaw, gibuksan ni Stephanie ang telebisyon. Mihigda siya sa lapad nga lingkoranan tupad sa katre ni Japhet aron sayon ra kaniya ang pagtan-aw sa pasundayag sa TV. Apan taud-taud, nahigmata si Japhet. (Sumpayan)