Broken Heart - Gula 4

“Nganong ako man ang gipili sir?” nakapangutana si Stephanie ngadto sa iyang superbisor. “Wala ko mahibalo kun nganong ikaw man ang gipili sa pasyente nga maoy iyang himoong special nurse. Kaila tingali kamo ni Mr. Japhet Menchavez,” sa superbisor pa.

Diha pa nahinumdom si Stephanie nga si Japhet diay nga iyang higala maoy mi-hire kaniya isip special nurse. Sa hilom nahinangop na lang ‘sab si Stephanie kay suod na man sila si Japhet. Sa ospital nga gialagaran ni Stephanie, dunay extra salary ang mga special nurse.

Miadto dayon si Stephanie sa nurses station sa ika-siyam nga andana. Gipahibalo ni Stephanie ang head nurse nga siya ang gikuha nga special nurse sa pasyente sa Room 906.

Gisusi ni Stephanie ang lawak aron masuta kun unsay mga kuwang. Wala pa didto si Japhet. Mibalik si Stephanie sa nurses station ug nananghid nga molakaw siya balik sa ilang ward. Gibinlan lang ni Stephanie og contact numbers ang duty nurse aron maka-inform dayon niya kun naa na ang pasyente.

Apan wala pa gani makabiya si Stephanie, duna nay pasyente nga gitulod luwan sa wheel chair nga gigawas gikan sa elevator. Gikulbaan si Stephanie kay nailhan dayon niya nga si Japhet ang maong pasyente.

Mipahiyom kaniya si Japhet. “Hi Step. Gi-inform ka na ba sa imong superbisor nga ikaw ang gikuha nako nga special nurse?” gisukna ni Japhet si Stephanie. Igo lang miyango si Stephanie ug misunod paglakaw paingon sa Room 906.

“Dili na lang tika hatagan og instruction Japhet kun unsay himoon kay isip imong special nurse naa ko tupad kanimo kanunay,” giingnan ni Stephanie ang iyang bag-ong            pasyente.

Wala mohigda si Japhet ug didto kini milingkud sa sopa. “Nganong gipa-admit ka diay sa imong doktor Japhet? Sa results sa imong 2D Echo negative man to,” matud sa nurse.

Mipahiyom si Japhet. “Tulomanon na nako nga kada tuig g’yud, matag Disyembre, magpahiling g’yud ko sa akong panglawas kay aron masayud kun unsay angay nga atimanon. Matud pa bitaw sa panultihon nga Health is Wealth.”

“Datu g’yud diay kaayo ka Japhet no? Dili ka man mailhan sa imong sinul-oban sa sinena,” matud ni Stephanie. Wala motingog si Japhet apan gihikap niya ang abaga sa nurse.

“Ayaw kabalaka kay sanglit pasko karon, daku ka’g pinaskohan gikan nako isip maoy akong special nurse,” ni Japhet pa. (Sumpayan)